МАН-ын удирдлагууд нөгөөдөр болох намын Их хурлын талаараа мэдээлэл хийлээ.

МАН-ын XXVII Их хурал аравдугаар сарын 27-ны өдөр буюу ням гаригийн өглөөний 08.00 цагт Соёлын төв өргөөнд эхэлж, гурван өдөр үргэлжилнэ гэдгийг намын ерөнхий нарийн бичгийн дарга Г.Занданшатар хэллээ. Их хуралд сонгогдсон 1134 төлөөлөгчийн түрүүч орон нутгаасаа ирсэн байгаа аж. Их хурлын бүрэлдэхүүний 343 нь Улаанбаатар хотоос, 791 нь хөдөө орно нутгаас сонгогдсон байна. Хамгийн залуу төлөөлөгч 22 настай бол хамгийн ахмад төлөөлөгчөөр 84 настай Г.Очирбат гуай байгаа аж.

 Хурлын бэлтгэл ажил ерөнхийдөө хангагдсан гэлээ.

Маргааш буюу 26-нд намын ээлжит IX Бага хурал хуралдаж Их хурлаар хэлэлцэх асуудлуудыг сонсож, зарим зөвлөгөө санамжийг гаргах юм байна. Мөн Их хурлын үеэр олон төлөөлөгчийн үг, бодол саналыг сонсч шийдвэрлэх асуудлууддаа тусгахын тулд гурван салбар хуралдааныг зохион байгуулах юм байна. Салбар хуралдаанууд Их хурал эхэлсэн өдрийн үдээс хойш буюу 27-нд Соёлын төв өргөө, Тусгаар тогтнолын ордны Их танхим буюу долдугаар давхарт, мөн ордны Бага танхим буюу гуравдугаар давхарт тус тус болно. Салбар хуралдаануудад намын мөрийн хөтөлбөр, дүрэмд орох зарим өөрчлөлтүүд, Монгол Улсын 2021 он хүртэлх хөгжпийн хөтөлбөр 2016 он хүртэлх намын бодлого үйл ажиллагааны чиглэл зэрэг асуудал яригдах аж. Хамгийн гол хэлэлцэх асуудал нь улс орны өнөөгийн байдалд дүн шинжилгээ хийж, үнэлэлт дүгнэлт өгөх явдал гэж Г.Занданшатар хэлэв.

XXVII Их хурлаар МАН-ын дарга Ө.Энхтүвшингийн улстөрийн илтгэл, Ерөнхий нарийн бичгийн даргын XXV Их хурлаас XXVII Их хурлын хоорондох ажлын тайлан болон Хяналтын ерөнхий хорооны тайланг хэлэлцэх аж.

 Энэ удаагийн хуралд гадаад, дотоодын 30 гаруй хүндэт зочин, төлөөлөгчид оролцох юм байна.