МАН-ын Их хурал нөгөөдөр болох гэж буйтай холбогдуулан тус намын удирдлагууд өнөөдөр мэдээлэл хийлээ. Энэ үеэр тус намын хэрэг эрхлэх газрын дарга Ш.Раднаасэдээс зарим зүйлийг тодрууллаа.

- Намын Их хурлын өмнө ямар нэгэн хүндрэлтэй асуудлууд тулгарсан уу?

- 13 хүний Их хуралд суух мандат нь хүчингүй болж байгаа. Учир нь зарим хүмүүс ирц бүрдээгүй, хэсэг хүмүүсийг цуглуулж хурал зохион байгуулсан. Үүнийг журам зөрчсөн үйлдэл гэж үзээд мандатыг хүчингүй болгосон.  Энэ тохиолдолд мандат нь хүчингүй болж байгаа учраас 1134 төлөөлөгчөөс 13 төлөөлөгч хасагдаж байна гэсэн үг. Харин энэ 13 хүний оронд өөр төлөөлөгч сонгох үгүйг Бага хурлын төлөөлөгч нар шийдэх байх.

- Намын даргад Н.Энхболд, М.Энхболд гэсэн хоёр хүнийг нэр дэвшинэ гэсэн албан бус мэдээлэл байна. Тэгэхээр намын одоогийн удирдлагуудын зүгээс яг тийм хүмүүс өрсөлдөнө гэсэн тодорхой хариулт хэлж болох уу?

- МАН шинэчлэгдэж, жинхэнэ ардчилалын тогтолцоогоор явж байгаагийн тод жишээ бол энэ Их хурал юм. Өмнө нь намын Бага, Их хурлыг хаалттай боллоо гэж та бүхэн шүүмжилдэг байсан. Энэ удаа МАН-ын даргад нэр дэвшиж буй хүмүүс өөрсдөө хэвлэлээр “Би өрсөлдөх болно” гэдгээ чөлөөтэй нээлттэйгээр хэлж байна. Энэ бол ардчилалын их чухал зарчим юм. Хоёр Энхболд даргын хувьд хүч үзнэ гэдгээ мэдэгдсэн. Ерөнхий нарийн бичгийн даргын хувьд ч чадалтай хүмүүс хүчээ үзнэ гэдгээ мэдэгдэж байгаа. Энэ бол харин ч их нээлттэй шинэчлэгдэж байгаагийн шинж юм.

- Маргааш болох Бага хурлаар ямар асуудал хэлэлцэгдэх вэ?

- Бага хурлаар Их хуралд оруулах улс төрийн илтгэл, удирдах зөвлөлийн тайланг хэлэлцэнэ. Илтгэл тавих хүмүүс өөрсдийнхөө илтгэлийг танилцуулна. Тэгээд зарчмын санал байвал түүнийг нь намын гишүүд нь нэмж хэлэх юм

- Их хурлын үеэр яг ямар асуудлууд нээлттэй байх вэ?

- Нээлтийн ажиллагаа нээлттэй. Мөн Монгол улсыг 2016 он хүртэл хөгжүүлэх хөгжлийн хөтөлбөрийн талаар нээлттэй хэлэлцэнэ. Мөн мөрийн хөтөлбөрийг сурвалжлахад нээлттэй. Харин намын дотооддоо хэлэлцэх асуудлуудыг хэлэлцэхэд хаалттай. Гэхдээ юу яригдсан талаар бид хэвлэлийнхэнд дараа нь нээлттэй мэдээлэл өгнө.

- Их хуралд хэр их хэмжээний мөнгө зарцуулж байгаа вэ?

- Энэ талаар яг одоо хэлэх боломжгүй. Их хурал дууссаны дараа санхүү тайлангаа гаргаж олон нийтэд мэдээлнэ.  Ямартай ч Их хурлын төлөөлөгч нар зардлаа өөрсдөө гаргаж ирж байгаа.