МАН-ын Ерөнхий нарийн бичгийн дарга асан У.Хүрэлсүх намын Их хуралд ирээгүй нь олны анхаарлыг татаж байсан билээ. Тэгвэл тэрбээр уг хурлын төлөөлөгчидөд хандан мэндчилгээ ирүүлсэн байна. Уг мэндчилгээнд,

   “МАН-ын гишүүд дэмжигчид болон XXVII их хуралд сонгогдсон төлөөлөгч, журмын нөхөд та бүхэнд баяр хүргэн мэндчилье. Монгол Улсын тусгаар тогтнол, үндэсний аюулгүй байдал, хөгжил дэвшлийн баталгаа болсон улс төрийн ууган хүчин МАН 90 гаруй жилийн хугацаанд олон арван сорилт бэрхшээлийг туулж ирсэн түүхтэй билээ. Сүүлийн 20 гаруй жил бид бүхэн намынхаа шинэчлэлийн төлөө хамтдаа зүтгэцгээсэн. Одоогоос гурван жилийн өмнө болсон МАН-ын XXVI их хурлаар бид МАН гэсэн ууган нэрээ сэргээсэн билээ. Энэ удаагийн XXVII их хурал эв нэгдэл, шинэчлэлийг авчрах хурал болно гэдэгт итгэлтэй байна. Та бүхэн намынхаа өмнө тулгараад буй цаг зуурын сорилт бэрхшээлийг амжилттай даван туулж, цаашид улс орныхоо хөгжлийн бодлого зорилтоо тодорхойлон, эр зоригтой, эрч хүчтэй дайчин ажиллахыг ард түмэн хүсэн хүлээж байна. Зориг эс хүрвэл, ухаан эс хүрнэ. Та бүхэндээ ажлын амжилт, сайн сайхныг хүсэн ерөөе” гэсэн байна.