МАН-ын 27-р Их хурал үргэлжилж байна. Энэ удаагийн хурлаар тус нам шинэчлэлийн асуудлыг голлон авч хэлэлцэж байгаа. Тэгвэл намын шинэчлэлийн асуудлаар МАН-ын Их хурлын төлөөлөгч М.Энхболдоос зарим зүйлийг тодрууллаа. Тэрбээр намын даргад нэр дэвшихээ мэдэгдээд байгаа билээ.

-   Энэ удаагийн Их хурлаар намаа бүрэн шинэчлэгдэж чадна гэж та бодож байна уу?

-   Манай намын Их хурал өнөөдөр эхэллээ. Хэлэлцэх асуудал болон гол илтгэлүүд тавигдчихлаа. Одоо гол хэлэлцэх асуудлууд руугаа орно. Энэ удаагийн Их хурал түүхэн онцлох цаг үед болж байна. Манай нам сүүлийн 90 жилд Засгийн эрхийг барьж улс орноо хөгжүүлэх, ард түмний аж амьдралыг дээшлүүлэх гэх мэт төрийн хүнд хүчир ажлын дор намынхаа Их хурлыг зохион байгуулж ирсэн бол энэ удаа сөрөг хүчний байр сууринаас зохион байгуулж байна. Үүгээрээ онцлогтой. Бид сүүлийн хэд хэдэн удаагийн сонгуульд ялагдсан. Тиймээс алдаа, оноо дутагдал юу байсан бэ гэдгийг энэ Их хурлаасаа дүгнэж, цэгнэж цаашид үйл ажиллагаагаа идэвхжүүлэхэд юу хийх ёстой вэ гэдгээ ярина. Мөн ард түмний нам болоход зорилт тавьж, арга замаа тодорхойлно. Энэ их хурлаас манай намын үйл ажиллагаа эрчимжиж ард түмний бидэнд итгэж байсан итгэл илүү нэмэгдэнэ гэж бодож байгаа.

-    Намын дүрмийн шинэчлэлийн асуудлаар та ямар байр суурьтай байгаа вэ?

-    Дүрмийн өөрчлөлтийн асуудлаар их олон асуудлыг хэлэлцэнэ. Намын төлөөллийн төв байгууллагын гишүүд  дөрвөн жилийн хугацаанд үүрэгтэй, үүрэггүй суугаад байдаг биш орон нутгийн намын анхан шатны байгууллагуудаас тухайн намын Бага хурлын гишүүний хийсэн гүйцэтгэсэн ажилд үнэлэлт өгч Бага хурлын гишүүнээр нь цаашид байлгах уу, эсвэл солих уу гэдгийг ярина. Энэ бол төлөөллийн төв байгууллагын идэвхтэй үйл ажиллагааг нь явуулахад их чухал алхам болно гэж үзэж байгаа. Ер нь төлөөллийн болон гүйцэтгэх дээд байгууллагаас гарч байгаа тогтоол шийдвэрүүдийг намын анхан шатны байгууллагуудаас санал онолыг нь авч байж гаргах болно. Яг ийм шинэ заалтын төслүүдийн өргөн барьж байгаа.

-    Та намын даргад өрсөлдөж байгаа. Хэрвээ сонгогдвол энэ намыг хэрхэн шинэчлэх вэ?

-   Бид сөрөг хүчний байр сууринаас ирэх он жилүүдэд ажиллана. Юуны өмнө Засгийн эрх барьж буй эрх баригчдын авч хэрэгжүүлж буй арга хэмжээнд алдаа оноо байна уу гэдэгт санал бодлоо хэлж, шүүмжлэлтэй хандах ёстой. Хоёрдугаарт биднийг Засгийн эрх барьж байх үед улс орны эдийн засагт бий болгосон амжилт ахиц өөрчлөлт болон ард түмний аж амьдралд гарч байсан нааштай эхлэлүүдийг дахин бий болгоно. Одоо энэ  түвшинг бууруулж байгаа байдалд сөрөг хүчний хувьд дуу хоолой, байр сууриа илэрхийлж ажиллах ёстой. Гэхдээ асуудал болгонд сөрөг хүчин хянах, шалгах сөргөлдөх байр сууринд хандах ёсгүй гэдгийг бид ойлгож байгаа. Хийх бүтээх бүтээн байгуулах үйлсэд ч хамтарч ажиллаж, тодорхой хувь нэмрээ оруулах ёстой гэж бодож байна.

-    Удирдлагын шинэчлэл хийхэд хайрцаглагдсан хурал болохгүй гэж ойлгож болох уу?

-    Бүрэн итгэж болно. Олон хүн намын дарга, Бага хурлын гишүүнд нэр дэвших боломж бололцоо нь чөлөөтэй.