МАН-ын 27-р Их хурал үргэлжилж байна. Энэ удаагийн Их хурлаар намын дүрэм, хөтөлбөрөөс эхлээд удирдлагуудыг сольж, шинэчилнэ. Намын даргад нэр дэвшиж өрсөлдөхөө мэдэгдээд буй Т.Аюурсайханаас Их хурлын үйл явцын талаар байр суурийг нь сонслоо.
МАН-ын 27-р Их хурал үргэлжилж байна. Энэ удаагийн Их хурлаар намын дүрэм, хөтөлбөрөөс эхлээд удирдлагуудыг сольж, шинэчилнэ. Намын даргад нэр дэвшиж өрсөлдөхөө мэдэгдээд буй Т.Аюурсайханаас Их хурлын үйл явцын талаар байр суурийг сонслоо. - Намын шинэчлэл хаанаас эхлэх ёстой гэж та бодож байна вэ?
- Бид удаа дараагийн сонгуульд ялагдсан. Үүнд дүгнэлт хийх ёстой. Муу муухай зүйл болгонд манай намын нэр холбогддог. Залуус, оюутнууд бүр дунд сургуулийн сурагчдын дунд манай намын талаар буруу ойлголт явж байна. Үүнийгээ хэлэлцэж, цаашид юу хийх ёстой вэ гэдэг арга ухаанаа гаргаж, ард түмнийхээ төлөө ажиллах ёстой.
- Та намын даргад өрсөлдөхөө мэдэгдсэн. Өөртөө хэр итгэлтэй байна вэ?
- Намын даргад өрсөлдөхөө олон нийтэд мэдэгдсэн байгаа. Шинэчлэлийн хороо жил гаруйн өмнөөс үйл ажиллагаагаа явуулж эхлэхдээ намын шинэчлэлийн бодлогыг дэвшүүлж тавъя гэж бэлтгэсэн. Энэ ажлынхаа хүрээнд намын гишүүдийн уулзалт хэлэлцүүлгийг зохион байгуулсан. Намын даргад өрсөлдөх шийдвэр бол миний бие даасан шийдвэр биш байсан. Энэ бол манай Шинэчлэлийн хорооны хамт олон болон орон нутаг нийслэлийн намын гишүүдээс гарсан шийдвэр байгаа. Тэгэхээр энэ нь сэтгэл хөдлөлөөр гаргасан шийдвэр биш юм. Бид бодлого шинэчлэлийн хөтөлбөрөө намын удирдлагын түвшинд санал болгосон. Мөрийн хөтөлбөр өөрчлөлтөө ч мөн санал болгосон. Манай намаас нийгэм олон зүйлийг хүсэн хүлээж байна. Намаа өөрчлөгдөхийг хүсч байна. Намдаа шинэ уур амьсгал оруулж, өөрчлөхийн тулд намаа нээлттэй дотоод ардчилалтай байлгахын тулд, шудрага ёс тогтоохийн тулд, жирийн гишүүдээ сонсдог, ахмадаа дээдэлдэг эмэгтэйчүүдээ хүндэлдэг оюутан залуусаа ойлгодог болгохын тулд хэрэгждэггүй санал санаачилгыг нь хэрэгжүүлэхийн тулд намын сонгуульд би нэр дэвшсэн.
- Намын даргыг сонгох үйл явц шудрага болно гэдэгт та хэр итгэлтэй байна вэ? - Нэр дэвшиж өрсөлдөж байгаа хүмүүс бодлогоо ярих ёстой. Шудрага сайхан өрсөлдөөсэй гэж бодож байна. МАН-ын даргыг сонгохдоо нэр дэвшиж байгаа хүмүүс нь бодлого хөтөлбөрөө танилцуулж, нийт улс орны түвшинд намын гишүүдээрээ хэлэлцүүлэн саналыг нь авах ёстой гэсэн саналыг бид гаргасан. Гэвч өнөөдрийг хүртэл харамсалтай нь энэ саналыг хүлээж авсангүй. Гэхдээ хөтөлбөр бодлогоо нээлттэй ярих байх гэж хүлээж байна. Намын нөхцөл байдал хүнд байгааг гишүүд маань ойлгож байгаа. Тийм учраас Их хурлын төлөөлөгч нар маань итгэл үнэмшлээрээ өөрсдийнхөө байр суурийг эрүүлээр тусгах байх.
- М.Энхболд намын дарга болно гэсэн албан бус яриа байна. Энэ байж болох хувилбар мөн үү? Та үүн дээр ямар байр суурьтай байгаа вэ? - М.Энхболд болон Н.Энхболд нар намын даргад өрсөлдөнө гэдгээ мэдэгдсэн байгаа. Мэдээж аль аль нь намдаа хүлээн зөвшөөрөгдсөн намынхаа төлөө хийсэн ажилтай хүмүүс. Тийм учраас бодлого хөтөлбөрөө танилцуулаад төлөөлөгчдийнхөө дунд өрсөлдөөд оролцох байх.
Т.Энхэлээ
