МАН шинэчлэгдэх биш ухарч байна. Сүр дуулиантай эхэлсэн 27-р Их хурлыг “шинэчлэлийн” гэж нэрлэн гишүүд нь олон өөрчлөлт хүсч байгаа. Гэтэл юун шинэчлэл харин ч үүнээсээ ухарч, шилдэг онигоонд орохоор үйл явдал Их хурлын танхимд өчигдөр боллоо. Ерөнхийлөгчийн сонгуульд тус намаас нэр дэвшсэн ч ялагдал хүлээсэн УИХ-ын гишүүн Б.Бат-Эрдэнэд намын удирдлагууд нь баяр хүргэсэн тун сонирхолтой үйл явдал өрнөлөө. Өмнө нь Монголын түүхэнд, тэр байтугай дэлхийн улс төрийн соёлд ялагдал хүлээлгэсэн хүнд баяр хүргэсэн тохиолдол байдаггүй. Тиймээс шинэчилэгдэнэ гэж Их хурлаа хийж байгаа намын хувьд том сонгуульд ялагдсан хүндээ баяр хүргэж, алга нижигнүүлэн ташсанд улс төр судлаачид болон ажиглагчид гайхаж байна.

   Өчигдөр болсон хурлын үеэр МАН-ын Ерөнхий нарийн бичгийн дарга Г.Занданшатар индэрээс Б.Бат-Эрдэнэ гишүүнд хандан үг хэлэхдээ “УИХ-ын гишүүн Б.Бат-Эрдэнэ хүч тэнцвэргүй нөхцөлд ёстой л аварга хүний хүчийг гарган эцэс цуцахыг умартан шударгаар өрсөлдсөнийг манай ард түмэн мартаагүй байна. Ерөнхийлөгчийн сонгуульд амжилттай, шударга, чин үнэнчээр өрсөлдөж 520 мянган хүний буюу 42 хувийн санал авч чадсан Б.Бат-Эрдэнэд Их хурлын төлөөлөгчид намын нийт гишүүд дэмжигчдийн өмнөөс чин сэтгэлийн халуун баяр хүргэж, төр түмнээ гэсэн ариун үйлсэд тань өндөр амжилт хүсэн ерөөж байгааг минь хүлээн авна уу” гэсэн байна.

   Хамгийн сонирхолтой нь Г.Занданшатарыг үг хэлсний дараа Б.Бат-Эрдэнэ гишүүн суудлаасаа босч, хоёр гараа өргөн Их хурлын төлөөлөгчидтэй мэндчилж сонгуульд ялсан хүн шиг жинхэнэ шоу хийж. Бүр сонирхолтой нь төлөөлөгчдийн ихэнхи нь түүнд баяр хүргэн алга нижигнүүлэн ташижээ. Үүнийг хөндлөнгөөс харсан ажиглагчид дор дор уулга алдан “Арай ч дээ. Ингэж шинэчлэгдэнэ гэж байх уу? Намаа ялагдалд хүргэлээ гээд баяр хүргээд байгаа юм шиг. Энэ эрүүл үзэгдэл мөн үү?” гэх зэргээр гайхсан байна. Харин энэ үйл явдал тус намын УИХ дахь гишүүдийг хоёр хуваагаад орхиж. Зарим нь Б.Бат-Эрдэнэд баяр хүргэх нь зүй ёсны асуудал гэсэн бол зарим нь үүнд дургүйцэж, ялангуяа Б.Бат-Эрдэнэ аварга хоёр гараа өргөн шоу хийсэнд ундууцсан байна. Ер нь Б.Бат-Эрдэнэ гишүүн сонгуульд ялагдсанаас болж тус намын удирдлагууд хариуцлага хүлээхдээ тулаад байгаа билээ. Зарим нь хариуцлагаа ухамсарлан ажлаа өгсөн.
     Ямартаа ч их шинэчлэлийг хүлээж байсан МАН-ын Их хурлын эхний өдөр ийм онигоотой байлаа. Энэ онигоог харсан ажиглагчид “МАН шинэчлэгдэнэ гэдэг эргэлзээтэй юм” хэмээн ам амандаа ярьж байна.