МАН-ын Их хурал дээр олон итгэл тавигдсанаас Ерөнхийлөгч асан Н.Багабандийн хэлсэн үг олон нийтийн анхаарлыг татлаа. Их хурлын үеэр намын дарга Ө.Энхтүвшин намын удирдлагууд сул ажилласан гэж дүгнэн доод шатны төлөөлөгчдийн загатнасан газар нь маажсан бол Н.Багабанди намын дарга болон Бага хурлын гишүүдээ сонгохдоо няхуур байхыг сануулсан юм. Тэрбээр МАН-ын өнөөгийн байдлын талаар дүгнэхдээ энэ намын ухрах, урагшлах, унах, босох нь бусдаас биш зөвхөн өөрсдөөс нь шалтгаална гэлээ. Намын шинэ даргыг сонгох гэж олон фракц, бүлэглэлд хуваагдаж, Их хурлын төлөөлөгчдийн саналыг өөрийн хүндээ татах гэж лобби хийцгээж байгаа нь Н.Багабандид таалагдаагүй бололтой.
 
   Тэрбээр “Төмрөөс зэв үүсээд эргээд төмрөө иддэгийн адил намын биен дээр ашиг хонжоо хайгчид, шударга бус үйлдэлтний хорт хавдар ургаж, хөлөө гэдсэндээ жийлцэн өвөр дотроо тэмцэлдвэл сулидаан доройтуулна” гэв. Өөрөөр хэлбэл түүний хэлсэн энэ үг намын даргаар муу хүн гаргавал өөрсдөө л идээ бээрэнд баригдаж сульдан доройтно шүү гэж Их хурлын гишүүдэд дайсан утгатай. Төмрөөс зэв үүсдэг хэрнээ эргээд төмрөө иддэг шиг намын дарга болчихоод эргээд намаа унагаадаг хүн бий гэж тэрбээр сануулав. Мөн “Аливаа улс төрийн хүчин дотооддоо өөрийгөө цэвэрлэн ариусгах, шинэчлэгдэн хөгжих, гаднаас ирэх аюулыг сөрж өөрийгөө хамгаалах чадвартай байж оршин тогтноно” гэсэн байна. Их хурлын төлөөлөгчид ч Н.Багабандийн онч үгийг тоож, нээрээ  тийм шүү гэх зэргээр өдөржин ярианы гол сэдэв болгожээ.

   Нэгэнт цагт намын нүүр царай болж явсан түүнийг ийм илтгэл тавьсныхаа дараа хэний захыг мушгиж суугаа бол гэдэг бас хэвлэлийнхний анхаарлыг татсан. Тэрбээр энэ удаагийн хуралд М.Энхболд, Н.Энхболд, Б.Бат-Эрдэнэ зэрэг хууччуулыг төдийлөн дэмжсэнгүй. Харин хамгийн залуу бас магадлал муутай нэр дэвшигч Т.Аюурсайханы захыг мушгиж суусан гэж эх сурвалж мэдээлж байна. Харин Ерөнхий нарийн бичгийн даргын суудалд Д.Цогтбаатарыг дэмжиж буйгаа илэрхийлж хэд гурван үг хэлжээ.