МАН-ын шинэчлэлийн нэртэй XXVII Их хурал дөрөв дэх өдрөө үргэлжилж байна. Энэ намд таван удаагийн сонгуулийн ялагдлын дараа хэлэлцэх, шийдвэрлэх олон асуудал байгаа бололтой.

    Хөтөлбөрийн дагуу МАН-ын Их хурал өчигдөр дуусах ёстой байж. Гэтэл асуудлаа шийдэж чадаагүй учир өнөөдөр дахин хуралдахаар болсон байна.

    Өчигдөр МАН-ынхан нийгмийн хамгийн том хүлээлт болсон удирдлагаа сонгосон. Тус намын удирдлагад нэр дэвшинэ гэж яригдаж байсан аварга Б.Бат-Эрдэнэ өрсөлдсөнгүй. Эртнээс өрсөлдөнө гэж хэвлэлээр мэдэгдэж байсан Н.Энхболд цагийн үеийн нөхцөл байдалаас үүдэн хүн чанар гарган нэрээ татаж буйгаа мэдэгдсэн юм. Түүний мэдэгдэл МАН-ын Их хурлын төлөөлөгчидөд төдийгүй Монголын нийгэмд ихээхэн таалагдав. Ингэснээр тэрээр дараагийн даргад өрсөлдөх нүхээ сайн гэгч нь малтав.

    Харин МАН-ын байран дахь эх сурвалжийн мэдээлснээр бол XXVII Их хурлын төлөөлөгчид хамгийн шоучин улс төрчөөр Ж.Энхбаярыг нэрлэсэн гэнэ. Өмнө түүнийг МАН-ын даргад нэрээ дэвшүүлнэ гэж мэдэгдсэн тухай хэвлэлүүд шуугиж байсан. Гэвч тэрээр хэвлэлүүдийг худал мэдээлэл цацлаа хэмээн тайлбарлаж нэрээ дэвшүүлэхгүй гэж ярьсан. Гэтэл хурал эхлэнгүүт Орхоны төлөөлөгчөөр нэрээ дэвшүүлээд “гэнэтийн шийдвэр” байлаа гэж хэлээд бэлдсэн цаасан дээрх үгээ сэргэлэн гэгч нь уншиж нэрээ татжээ. Хамгийн сонирхолтой нь Ж.Энхбаяр залуучууд, эмэгтэйчүүдийг ихэд үнэлж намынхаа бүх л дарга нарыг нэр заан цохож ихэд магтан оноо авчээ. Тэгэхдээ ганцхан М.Энхболдын нэрийг дурдаагүй аж. Үүнийг нь МАН-ын гишүүд М.Энхболдод дургүйцэж байгаагаа харуулсан хэлбэр ч гэж ярилцжээ. Юутай ч гэсэн нэрээ дэвшүүлэхгүй гэж мэдэгдэж байсан Ж.Энхбаяр нэрээ дэвшүүлээд хөөрхөн шоу хийчихжээ.

    Ийнхүү МАН-ынхан удаан ч гэсэн ажил хэрэгч уур амьсгал дунд хурлаа үргэлжлүүлсээр байна. Өнөөдөр шинэ Бага хурлын гишүүдээ тодруулах хуваарьтай аж. Шинэ Бага хурал нь маргааш нөгөөдөр үргэлжлүүлэн хуралдаж ерөнхий нарийн бичиг болон бусад орон тооны, орон тооны бус нарийн бичгийн дарга, удирдах зөвлөлийн гишүүдээ сонгох гэнэ. Ингэснээр МАН-ын олон ялагдлын дараах Их, Бага хурал зургаан өдөр үргэлжилэхээр байна. Монголын нийгэм МАН-ын Их, Бага хурлаас шинэчлэлийг хийж чадах шинэ багийг хүлээсээр байна.