НҮБ-ын Ерөнхий Ассамблейн 68 дугаар чуулганы 2 дугаар хороонд ХАА-н хөгжил, хүнсний аюулгүй байдлын асуудлаар Засгийн газрын байр суурийг илэрхийлж Монгол Улсаас НҮБ-ын дэргэд суугаа Байнгын төлөөлөгчийн орлогч Г.Баттунгалаг энэ сарын 28-нд үг хэлэв.Хүнсний үнийн өсөлт нь инфляцийг хөөрөгдөж, энэ нь ялангуяа хөгжиж буй орнуудын эдийн засгийн хөгжилд сөргөөр нөлөөлж буйг дурдаж, хүнсний үнийн өсөлтийг бууруулах, хүн амын эмзэг давхаргад учрах дарамтыг сааруулах чиглэлээр Монгол Улсын Засгийн газраас авч хэрэгжүүлж буй арга хэмжээг танилцуулав.
Тухайлбал, хүнсний бүтээгдэхүүний үйлдвэрлэлийг дэмжих, хүнсний импортын хамаарлыг багасгах, хүнсний чанар, аюулгүй байдлын талаар олон нийтийн мэдлэгийг дээшлүүлэх зэргээр бүх түвшинд хэрэгжиж буй ажлын талаар мэдээлэв. Түүнчлэн "Хүнсний тухай хууль", "Хүнсний бүтээгдэхүүний аюулгүй байдлыг хангах тухай хууль"-ийг УИХ-аас өнгөрсөн жил баталж, мах, сүү, өндөг, төмс хүнсний ногоо, ургамлын тосны дотоодын хэрэгцээгээ бүрэн хангах зорилтыг 2012-2016 оны мөрийн хөтөлбөртөө Засгийн газар тусган ажиллаж буйг дурдав.
Хүнсний хаягдлын хэмжээ дэлхийн түвшинд нэг жилд 1,3 тэрбум тонн-д хүрсэн нь олон улсын хамтын нийгэмлэгийн зүгээс тодорхой арга хэмжээ авах шаардлага тулгарч байгааг манай төлөөлөгч онцлов. Үүнтэй холбогдуулан энэ жил Дэлхийн байгаль орчны өдрийг " Хүнсний хэмнэлттэй хэрэглээ: Бодъё - хэрэглэе - хэмнэе " сэдвийн хүрээнд зохион байгуулсан нь цаг үеэ олсон чухал гэдгийг сайшааж, уг арга хэмжээг Монгол Улсын Засгийн газартай хамтран амжилттай зохион байгуулсанд Хүрээлэн буй орчны НҮБ-ын хөтөлбөрт талархал илэрхийлэв.
Хөдөө аж ахуйг хөгжүүлэх, эрчимжүүлэх чиглэлээрх гишүүн орнуудын хүч чармайлтад үр дүнтэй дэмжлэг үзүүлж ирсэн Хүнс, хөдөө аж ахуйн байгууллагын үйл ажиллагааг сайшааж, уг байгууллагын Ази, Номхон далайн бүсийн 32 дугаар чуулганыг ирэх онд өөрийн оронд зохион байгуулах болсныг мэдээлэн түүнд идэвхтэй оролцохыг гишүүн орнуудад уриалав.
Хөдөө аж ахуйн тогтвортой хөгжил, хүнсний аюулгүй байдлыг хангах нь ядуурлыг бууруулах, ган, цөлжилт, газрын доройтол зэрэгтэй салшгүй уялдаатай тул Тогтвортой хөгжлийн шинэ зорилтууд болон 2015 оноос хойших хөгжлийн хөтөлбөрт тэдгээр нь тусгагдах ёстой гэдгийг манай төлөөлөгч тэмдэглэв.
Хөдөө аж ахуйн хөгжилд хоршоолол, цаашилбал эмэгтэйчүүдийн үүрэг чухал гэдгийг дурдаж, хоршоолол, хөдөөгийн эмэгтэйчүүдийн аж байдлыг сайжруулах зэрэг асуудлаар Монгол Улсаас санаачилсан НҮБ-ын Ерөнхий Ассамблейн тогтоолын төслийг дэмжиж, хамтран зохиогчоор оролцохыг уриалав.
