УИХ-ын гишүүн С.Бямбацогттой ярилцлаа.

- МАН-ын 27-р их хурлаар хэлэлцсэн Монгол Улсын Хөгжлийн хөтөлбөр боловсруулах ажлын хэсгийг та ахалж ажилласан. Энэ бичиг баримтын гол ач холбогдол болоод зорилго нь юу байв?
- МАН-ын түүх бол Монгол Улсын түүхтэй салшгүй холбоотой. Монгол улсын хөгжил дэвшил ч мөн ялгаагүй энэ намын үйл ажиллагаатай холбоотой байсаар ирсэн. Цаашид ч холбогдсоор байх болов уу. Манай нам өмнө нь Ард түмний хөгжлийн хөтөлбөрийг 2031 он хүртэл урьдчилан тооцоолж гаргаж байсан. Гэвч өнгөрсөн хугацааны улс төр, нийгмийн нөхцөл байдал энэхүү хөтөлбөрийг дахин тодотгох шаардлагыг бий болгосон. Манай ажлын хэсэг сар гаруйн хугацаанд Монгол Улс 2021: Хөгжлийн зорилтууд хэмээх бичиг баримтыг боловсруулан гаргалаа.  Олон орны хөгжлийн нэгдсэн бодлогыг судалж харьцуулж, хөгжлийн шинэ хэрэгцээ шаардлагуудыг тойрч нэлээд өргөн хүрээтэй судалгаатай том ажил болсон. Энэ дашрамд ажлын хэсгийнхээ нийт гишүүд, эрдэмтэн мэргэд, намын гишүүд дэмжигчиддээ талархаж байгаагаа илэрхийлье.  Монгол Улс нэгдсэн нэг хөгжлийн хөтөлбөртэй болж түүнийг аль ч нам Засгийн эрх барьж байхдаа хэрэгжүүлээд явдаг болох нь чухал байна. Төрийн нэгдмэл бодлого, хөгжлийн хэрэгцээ, бодлогын залгамж халаагаа хадгалж явах үндэсний эв нэгдлийг хангахад энэхүү бодлогын баримт бичиг их ач холбогдолтой.

- Хөгжлийн зорилтуудаа хэрэгжүүлэхийн тулд ямар ажил хийгдэх вэ?
- Юуны өмнө бид улс орноо хөгжүүлэх нэгдсэн бодлогогыг гаргаж хуульчлах санаачлагыг гаргаж байна. Үүнийгээ УИХ-аар хэлэлцүүлэн батлуулж аль ч Засгийн газар байгуулагдсан үргэлжлүүлэн хэрэгжүүлдэг бодлогын бичиг баримт болгох юм. Тиймээс ч ерөнхийлөгч, ерөнхий сайд, УИХ-ын дарга, нам эвслүүдэд хандаж уриалга гаргалаа. Өөрөөр хэлбэл үндэсний хэмжээний чухал асуудлыг шийдвэрлэхэд зөвшилцдөг, үндэсний зөвшилцлийн соёлыг бий болгоё гэж байгаа юм. Хэдий болтол бие биенийхээ муу муухайг дуудаж, төрийн ажлыг гацаадаг байх вэ. Үндэсний зөвшилцөл бол бодлоготой, тогтвортой хөгжихийн үндэс юм.

- Намын Их Хурлын үр дүнг хэрхэн харж байна вэ?
- Энэ удаагийн МАН-ын их хурлаар Монгол улсын хөгжлийн асуудал, түүнд оролцох намын оролцоог чухалчилсан. Цөөнх болсон нам хөгжлийн асуудал ярих нь утгагүй гэж хэлэх хүмүүс байна. Харин бид эрх баригчдын алдаатай бодлогыг шүүмжилдэг сөрөг хүчин биш, тэдний бурууг зөв рүү чиглүүлдэг, бүтээлч цөөнх байх болно. Намын их хурлын ихэнх төлөөлөгч ийм санаа бодолтой байгаа нь хурлын хамгийн гол үр дүн.