МАН-ын шинэ удирдлагууд өнөөдөр хэвлэлийнхэнд мэдээлэл хийлээ. Энэ үеэр намын Их, Бага хурлыг амжилттай болж өнгөрснийг намын дарга М.Энхболд онцолсон юм. Мөн тэрбээр намын Ерөнхий нарийн бичгийн дарга болон нарийн бичгийн даргууд, удирдах зөвлөлийн гишүүдийг танилцуулсан юм.

Их, Бага хурлын үеэр намын дарга УИХ дахь намын бүлгийг даргалах тухай асуудал яригдсан байна. Тус асуудлыг удирдлагын зөвлөлийн хүрээнд ярилцаж байж шийднэ гэдгийг намын дарга М.Энхболд хэллээ. Мөн цаашид намын даргын дэргэд бодлогын зөвлөл ажиллахаар болсон байна.

Хэвлэлийн хурлын дараа МАН-ын Ерөнхий нарийн бичгийн дарга Ж.Мөнхбат сэтгүүлчдийн асуултад хариулт өглөө.

-    Таныг намын  шинэ дарга М.Энхболдтой гар нийлж ажиллаж чадах үгүй талаар хэвлэлийнхэн таамаглал дэвшүүлж эхэлсэн байна. Энэ асуултанд тайлбар хийнэ үү?

-    Ер нь сонгох, сонгогдох эрх үндсэн хууль болон намын дүрэмд нээлттэй байдаг. Эрхээ эдлэх нь хувь хүний өөрийнх нь асуудал учраас эрхээ эдэлж өрсөлдсөн. Сонгуулийн үр дүнг хэвлэлүүд өөр өөрсдийнхөөрөө таамаглаж байсан. Би 55 хувийн санал авч намын Ерөнхий нарийн бичгийн дарга болсондоо баяртай байгаа. 1999 онд хоёрдугаар курсын оюутан МАН-д анх удаа гишүүнээр элсэж байсан. Үүнээс хойшхи 14 жилийн хугацаанд намын үүрэг даалгавараар хөдөө хотгүй явж, жагсаж тэмцэхээс эхлээд бүх ажилд нь оролцож ирсэн. Хөдөөний сумын эгэл жирийн малчин айлын хүүхэд бас 34 настай залуу МАН-ын Ерөнхий нарийн бичгийн даргад өрсөлдөж, ялж сонгогдож болдог юм байна гэдгийг өчигдрийн хурлаар харууллаа. Энэ Их хурал манай нам үнэхээр шинэчлэгдэж, өөрчлөгдөж байгаа юм байна гэдгийг харууллаа. Зарим өрсөлдөж буй хүмүүс Их хурлын өмнө Ерөнхий нарийн бичгийн даргын мөрийн хөтөлбөрийг гаргаж байсан. Тэгэхээр намын Ерөнхий нарийн бичгийн даргын мөрийн хөтөлбөр гэж байдаггүй юм. Их хурлаас баталсан намын мөрийн хөтөлбөр болон намын даргын мөрийн хөтөлбөриг л Ерөнхий нарийн бичгийн дарга хэрэгжүүлэх үүрэгтэй. Өөрөөр хэлбэл айлаар бол намын нь дарга нь аав, Ерөнхий нарийн бичгийн дарга нь ээж юм. Тэгэхээр аав, ээж хоёр өөр өөр тийшээ хараад хоёрдмол санаатай байж болдоггүй. Нэг тийшээ харж, нэг зүйлийг хамтдаа туулж чаддаг байх хэрэгтэй гэж бодож байна. Тийм учраас би намын даргынхаа тулах цэг нь болж гар, сэтгэл нийлж ажиллаж чадна. Би аль ч даргын үед албан тушаал гуйж, горьдож яваагүй. Энэ удаагийн сонгуульд би өөрийнхөө итгэл үнэмшилдээ найдаж өрсөлдсөн.

-    Сөрөг хүчин болж байгаа энэ хүнд үед намын Ерөнхий нарийн бичгийн даргаар сонгогдож байна. Таны эсрэг сөрөг байр суурь хэр мэдрэгдэж байна вэ?

-    МАН 12 жилийн турш эрх баригч байсан. Өнөөдөр бид хүссэн ч, эс хүссэн ч сөрөг хүчний байр суурин дээр үйл ажиллагаа явуулахаас өөр боломжгүй болсон. Тийм болохоор бид стратеги болон үйл ажиллагааныхаа хурд, менежмэнтээ өөрчлөхөөс өөр аргагүй. Мөн хурдацтай хөгжиж буй нийгмийн сэтгэлгээнд улс төрийн нам дасан зохицож хөгжих ёстой. Би МАН-ыг дайчин, тэмцэгч, шуурхай чадварлаг сөрөг хүчин байлгахад бүх талын ажлыг нь хариуцаж ажиллана. Хүний нөөцийн хувьд даргын үүд сахиж, бөөрөнд наалдаж асуудлаа шийдүүлж, албан тушаал ахидаг байдлыг хална. Сөрөг хүчин болсон энэ хүнд хэцүү цагт зугтсан нь биш зүтгэсэн нь амжилтын хойморт суудаг зарчмыг бий болгоно.

МОНГОЛ АРДЫН НАМЫН УДИРДАХ ЗӨВЛӨЛИЙН ГИШҮҮД
1.    Жамъянгийн Мөнхбат /Ерөнхий нарийн бичгийн дарга/
2.    Хүрэлбаатарын Булгантуяа /нарийн бичгийн дарга/
3.    Түдэвхүүгийн Гантулга /нарийн бичгийн дарга/
4.    Нямаагийн Энхболд /нарийн бичгийн дарга/
5.    Бадмаанямбуугийн Бат-Эрдэнэ /нарийн бичгийн дарга/
6.    Жаргалтулгын Эрдэнэбат /нарийн бичгийн дарга/
7.    Отгонбилэгийн Содбилэг /нарийн бичгийн дарга/
8.    Чимэдийн Хүрэлбаатар /нарийн бичгийн дарга/
9.    Долгорсүрэнгийн Сумьяабазар /нарийн бичгийн дарга/
10.    Цэндийн Нямдорж /удирдах зөвлөлийн гишүүн/
11.    Янгугийн Содбаатар /удирдах зөвлөлийн гишүүн/
12.    Лувсанцэрэнгийн Энх-Амгалан /удирдах зөвлөлийн гишүүн/
13.    Даваажанцангийн Сарангэрэл /удирдах зөвлөлийн гишүүн/
14.    Алмаликийн Тлейхан /удирдах зөвлөлийн гишүүн/
15.    Дамдины Цогтбаатар /удирдах зөвлөлийн гишүүн/
16.    Пүрэвдоржийн Анужин /удирдах зөвлөлийн гишүүн/
17.    Санжаагийн Оюунбилэг /удирдах зөвлөлийн гишүүн/
18.    Цэндсүрэнгийн Сандуй /удирдах зөвлөлийн гишүүн/
19.    Дуламсүрэнгийн Оюунхорол /удирдах зөвлөлийн гишүүн/
20.    Намхайн Төмөрхүү /удирдах зөвлөлийн гишүүн/
21.    Баатарын Амарсанаа /удирдах зөвлөлийн гишүүн