МАН-ын Ерөнхий нарийн бичгийн дарга болох магадлалтай хүн гэгдэж байсан Ж.Сүхбаатар генсек байтугай орон тооны бус нарийн бичгийн даргаар ч томилогдож чадсангүй. Тэрбээр намынхаа их хурлын өмнө МАН-ын дүрэмд өөрчлөлт оруулах ажлын хэсгийг ахалж, ихэд хүчин чармайлт гаргасан. МАН дараалан сонгуульд ялагдахад мөн л хүч гарган ажиллаж байсан цөөхөн хүний нэг. Мөн нам доторх зарим томчууд нь түүнийг дэмжиж байсан нь найдвар төрүүлж байв. Гэсэн ч тэрбээр Ж.Мөнхбатад 35 хүний саналаар ялагдсан. Тиймээс ихэд бухимдаж, эсрэг санал өгсөн Бага хурлын гишүүддээ гомдсон бололтой.

   Тэрбээр Ж.Мөнхбатыг генсек болсны дараа өөрийн твиттерт хуудаст “Конторын, заалны улс төрөөс нийгмийн улс төр хүчтэй. Нам дамжсан ба хуулийн ажилтнуудын халхавчинд орсон луйварчид энэ улс орныг хэдий болтол дарлаж, доромжилж даврах вэ?” гээд нэгэн эрхмийн нэрийг цохон нэрлэжээ. Тэрбээр “Авлигачдад дайн зарлалаа гэдэг яагаад авилгын мафийн эзэд шорон орохгүй байна. Манай улсын авилгын загалмайлсан эцэг болох Х.Бадамжунай тэргүүлдэг. Тагнуул, цагдаа, АТГ, шүүх, шашин, нийслэлийн удирдлагад МАН, АН дамжсан далд сүлжээ хэрсэн. Х.Бадамжунай гэдэг мафи шоронд ороогүй цагт Монголд авилгачид жаргаж олон түмэн айдас доромжлол амссаар байх болно” гэж нэг намын нөхөр рүүгээ дайрч давшилсан байх юм. Нэгэнтээ УИХ-ын гишүүн байсан, намын дотоод аппаратад олон жил ажилласан хэрнээ намын хүнээ авлигачнаар нь дуудаж, шоронд орох ёстой гэж занасныг бодоход үнэхээр түүний уур ундууцал хүрсэн бололтой.
    Учир нь түүнийг Ерөнхий нарийн бичгийн дарга болох замд МАН-ын хотын бүлэглэл буюу М.Энхболдын фракцынхан саад хийсэн. Х.Бадамжунай ч энэ бүлэглэлд багтдаг. Тиймээс ч Х.Бадамжунай тэргүүтэн өөрийг нь генсек болгосонгүй хэмээн дээрх үгийг чулуудсан гэж түүний хүрээнийхэн ярьж байна.