УИХ-ын дарга З.Энхболд орон нутгийн Иргэдийн төлөөлөгчдийн хурлын дарга нар болон аймгуудын Засаг дарга нартай өнөөдөр “Их Тэнгэр” цогцолборт уулзаж, санал бодлыг нь сонсож, харилцан ярилцлаа.

   Орон нутгийн удирдлагууд цаг үеийн асуудлаар төрийн удирдлагуудтай ярилцаж, мэдээлэл солилцохоор энэ өдрүүдэд нийслэлд хүрэлцэн ирээд байгаа аж. Уулзалтыг нээж УИХ-ын дарга З.Энхболд хэлсэн үгэндээ, Их Хурлаар төсөв ид яригдаж байгаа цагаар орон нутгийн удирдлагуудтай ийнхүү нүүр тулан уулзаж, ярилцаж байгаа нь чухал ач холбогдолтой гээд зөвхөн Их Хурал, Засгийн газрыг хараад суух биш орон нутгийн удирдлагууд дор бүрнээ төсвөө нягталж, хариуцлагатай, санаачлагатай ажиллах үүрэгтэй, ялангуяа “авилгажсан төсөв” гэж яригдаж байгаатай холбоотой судалж, нягтлах, алдаа байгаа бол шалтгааныг нь тодруулж, засаж залруулах тал дээр бүх шатандаа анхаарч, хамтран ажиллахыг үүрэг болголоо. Мөн алдаа гаргасан төрийн албан хаагчтай хатуу хариуцлага тооцдог зарчмыг баримтлан ажиллах шаардлагатай байгааг ч хэлсэн юм.

   Өнгөрсөн жилүүдэд Иргэдийн төлөөлөгчдийн хурлын дарга Засаг даргынхаа удирдлага дор орсон мэт үйл ажиллагаа явагдаж ирсэн  тохиолдол цөөнгүй гарсан, гэтэл Үндсэн хуульд зааснаар Иргэдийн төлөөлөгчдийн хурал нь Засаг даргын ажилд хяналт тавих ёстой байгууллага, тиймээс эдгээр албан тушаалыг хашиж байгаа хүмүүс захирах, захирагдах үүргийг сайтар ухамсарлаж ажиллах нь зүйтэй гэдгийг Их Хурлын дарга өнөөдрийн уулзалтад оролцож байгаа нийт төлөөлөгчдөд хандан анхаарууллаа.

   УИХ-ын дарга З.Энхболд үргэлжлүүлэн УИХ-аар батлагдсан хууль, тогтоомжуудын талаар товч танилцуулж, орон нутгийн иргэдэд хуулийг сурталчлах ажлыг идэвхжүүлж, мэдээллийн шинэ технологийг ашиглах, цахим хэлбэрээр олон хүнд хүртээмжтэйгээр, шуурхай энэ ажлыг амжуулж сурахыг үүрэг болгосон юм.

   Уулзалт асуулт, хариултаар үргэлжилж, Өвөрхангай аймгийн Засаг дарга Д.Тогтохсүрэн шинээр батлагдах Төсвийн хуулийн хүрээнд, орон нутгийн хөгжлийн санд нэмэлт өөрчлөлт оруулах талаар санал бодлоо илэрхийллээ. Мөн Дорноговь аймгийн Засаг дарга П.Ганхуяг, төрийн аудит болон өмчийн асуудлаархи хуулийг орон нутагт хэрэгжүүлэхэд юуг анхаарах талаар тодруулж асуусан юм.

   Уулзалт хоёр өдрийн турш үргэлжлэх бөгөөд энэ үеэр Монгол Улсын Ерөнхий сайд Н.Алтанхуяг, УИХ-ын гишүүн, Төсвийн байнгын хорооны дарга Ц.Даваасүрэн нар орон нутгийн удирдлагуудтай уулзаж, ярилцах юм гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.