Ийм яриа МАН-ын байрнаас гарч Улаанбаатарын ард иргэдийн дунд тархаж эхэллээ. Удахгүй улс даяар түгэх биз. Яагаад ийм яриа гарах болов? Үнэхээр ийм үйл явдал болсон уу? МАН-ын бүх удирдлагыг нэг хүн томилсон гэдэг ортой юу? гэдгийг тайлбарлан батлах эх сурвалж гарахгүй байна. Гэхдээ л бүх удирдлагын ард яагаад Т.Бадамжунай гэдэг нэр зоолттой байна вэ гэдэг олон хүний анхаарлыг татах болов.

    МАН-ын үе үеийн удирдлага болоод аймаг, нийслэл, дүүргийн намын хороодын дарга нарын тохирсон Бага хурлын гишүүдийг Т.Бадамжунай, Ц.Сандуй хэмээх хоёр хүн дур мэдэн өөрчилсөн гэсэн яриа Их хурлын сүүлээс гарч эхэлсэн. Тийм ч учраас Бага хурлын бүрэлдэхүүн буруу байсан тухай хүн бүр ярих болов. Хэрэв үнэн бол Бага хурлын бүрэлдэхүүн Т.Бадамжунайгийн санаачилгаар явсан бололтой. Үр дүнд нь Н.Багабанди, С.Баяр, С.Батболд, Ө.Энхтүвшин, У.Хүрэлсүх нар шинэ даргынхаа эсрэг санал нэгтэйгээр зогсох болсон байна.     

    МАН-ын дарга М.Энхболдыг олон жилийн турш Т.Бадамжунайтай найз нөхөр явсан гэж ярьдаг. Нэгэн цагт хамтарч Улаанбаатарыг удирдаж явсан. Тиймээс л М.Энхболдын ард Т.Бадамжунай бий гэсэн хардлага гарч улам бүр лавширсаар байгаа бололтой. Уг хардлага нь зөрчил ихтэй байгаа МАН-ын даргын нэр хүндийг улам л бүдгэрүүлэх эхлэл болов.

    Харин МАН-ын ерөнхий нарийн бичгийн даргыг Т.Бадамжунай томилсон гэх яриа илүү үндэслэлтэй байж мэднэ. Учир нь тэрээр өнгөрсөн сонгуульд нэр дэвших гэж байгаад өөрийнхөө оронд Ж.Мөнхбатыг дэвшүүлсэн юм. Алтан нутаг гэсэн амин холбоотой. Түүнээс гадна Ж.Мөнхбатыг хамгийн ихээр дэмжсэн хүн бол УИХ-ын гишүүн Б.Бат-Эрдэнэ. Түүнийг ерөнхийлөгчид нэр дэвшихэд Ж.Мөнхбат хамтдаа бүх аймгийг тойрсон. Тэгээд ч Ж.Мөнхбат ерөнхий нарийн бичгийн дарга болоод яриа өгөхдөө “Хэцүү үед намаа дэмжээгүй хүмүүсийг дэмжиж ажиллахгүй” гэж мэдэгдсэн нь Б.Бат-Эрдэнийн өмнөөс өшөө авна гэсэн агуулгаар хүмүүст ойлгогдсон.

    МАН-ын нарийн бичгийн даргыг Т.Бадамжунай томилсон гэх яриа бас л үндэслэлтэй гэнэ. Эх сурвалжийн мэдээлж байгаагаар бол Т.Бадамжунайг ХХААХҮ-ийн сайд байхад МАН-ын нарийн бичгийн дарга Т.Гантулга төрийн нарийн бичгийн даргаар ажиллаж гар сэтгэл нийлж байжээ.

    Мөн энэ намын шинэ Удирдах зөвлөлийн олонх нь Т.Бадамжунайгийн ойр дотны хүмүүс гэнэ. Тиймээс л Ж.Сүхбаатарын зарласанчилан тагнуул, шүүх, цагдаа, шашин, намыг хирсэн том сүлжээний эзэн Т.Бадамжунай болж харагдаад байгаа бололтой.