БНСУ-ын Сөүл хотод эсийн алдагдал гэсэн оноштойгоор эмчлүүлж буй МАХН-ын дарга Н.Энхбаярын биеийн байдал дээрдэж байгаа талаар хүү Э.Батшугар нь ярьжээ. Гэхдээ тэрбээр удахгүй дахин хоёр төрлийн хагалгаанд орохоор болжээ. Тэр нь чухам ямар төрлийн хагалгаа гэдэг нь одоогоор тодорхойгүй байна. Энэ талаар ч намын гишүүд нь нууцалж байгаа юм.

Тэрбээр өмнө нь  шөрмөсний болон чихний хагалгаа хийлгэсэн. Тус хагалгаа нь амжилттай болсон бөгөөд биеийн байдлын эдгэрэлт ч сайн байгаа аж.

Түүнчлэн түүний эмчилгээ нь хэзээ бүрэн дуусах нь одоогоор тодорхойгүй байгаа гэж эх сурвалжууд хэлж байна.

Тэрбээр БНСУ-д эмчлүүлээд хоёр сарын хугацаа өнгөрч байгаа бөгөөд энэ хооронд 1.5 кг жин нэмсэн байна. Өнгөрсөн хугацаанд түүнийг Сангийн сайд Ч.Улаан, МАХН-ын генсек Г.Шийлэгдамба тэргүүтэй намынх нь гишүүд хоёр ч удаа эргэж очсон юм. Хамгийн сүүлд хэд хоногийн өмнө түүнийг намын гишүүд нь дахин эргэж очсон байна. Мөн Н.Энхбаярыг Солонгост амьдарч буй монголчууд эргэж очин биеийн байдалд нь анхаарал тавьж байгаа гэнэ. Э.Батшугарын хэлж буйгаар биеийн байдлаас нь шалтгаалж, Монголд ирэх үгүйгээ шийдэх бөгөөд өдөр бүр бие нь сайжирч байна гэх таатай мэдээ дуулаад баярлаж байгаа гэнэ. Түүнтэй хамт эхнэр О.Цолмон нь хамт байгаа аж.

Н.Энхбаярыг буддын шашин шүтдэг гэдгийг хүн бүр мэднэ. Тэгвэл тэрбээр бурханы шашин мөргөлөө Солонгост ч үргэлжлүүлж, БНСУ-ын Буддын шашны тэргүүнээр хоёр дахь удаагаа сонгогдсон хамба лам Чачинд бараалхан ойр ойрхон уулзаж байгаа юм байна.