МАН-ын долоо хоног үргэлжилсэн XXVII Их хурлын дуулиан шуугиан намжаагүй байна. Гэвч их тулалдааны өмнөх нам гүм гэгчээр олны танил эрхэмүүд нь гарч ирээд сэлэм эргүүлчихгүй байдлыг ажиглаж эхэллээ. Учир нь нийгмийн санаа бодолд нийцээгүй удирдлагын баг гарч ирсэн гэсэн шүүмжлэл цахим ертөнцөөр ид хүчээ авч байна.

    Олон нийт хүлээж авахааргүй багийг гаргаж ирсэн учир энэ намын зарим нөлөө бүхий гишүүд зайгаа барьж эхэлсэн мэдээлэл ирлээ. Тухайлбал МАН-ын Удирдах зөвлөлд орохоосоо Ө.Энхтүвшин шууд татгалзжээ. Тэгэхдээ “хариуцлага хүлээж ажлаа өгчихөөд Удирдах зөвлөлд нь ороод ирж болохгүй. Тиймээс энэ удаад татгалзаж байна” гэсэн соёлтой үгийг хэлээд алга болжээ. Олны өмнө ийм үг хэлсэн Ө.Энхтүвшин дарга журмын нөхөддөө “нийгэм хүлээж авахааргүй хүмүүсийн дунд ороод яахав дээ. Цаг нь ирнэ дээ” гэсэн тайлбар хэлсэн тухай Засгийн ордны гишүүд шивнэлдэж байна.

    Ө.Энхтүвшингийн дараа намынхаа Удирдах зөвлөлөөс зориг гарган татгалзсан эрхэмүүд бол УИХ-ын залуухан гишүүн С.Бямбацогт, Ж.Энхбаяр хоёр аж. Энэ хоёр эрхэмийг олон нийт намын даргад зүтгүүлж болох тухай мессежийг нисгэж байсан. Харин хоёулаа тийм бодолгүй гэдэгээ их хурлынхаа үеэр ярьсан билээ. Гэвч удирдлагынхаа шинэ багийг харчихаад хоёулаа Удирдах зөвлөлөөс татгалзаж байгаагаа хэлчихээд утсаа салган алга болсон гэнэ. МАН-ын ирээдүйн лидерт зүй ёсоор тооцогдож байгаа хоёр залуу гишүүн үгсэн тохирсон мэт утсаа унтрааж алга болсон шалтгааныг янз бүрээр тайлбарлаж эхэлжээ.

    Гэвч УИХ-ын хоёр залуу гишүүн өөрсдөө энэ талаараа албан ёсоор тайлбар хийгээгүй байна. Удахгүй энэхүү сонголт, шийдлийнхээ талаар сонирхолтой тайлбар хийх нь гарцаагүй. Учир нь энэ хоёр эрхэм хэлэх гэснээ хэнээс ч айхгүй хэлчихдэг УИХ-ын “зоригтой” хэмээх гишүүдийн эгнээнд багтдаг билээ. Тэд яагаад ийм сонголт хийх болов гэдэг тайлбар нэг хэсэгтээ МАН-ын гишүүдийн төдийгүй нийгмийн дуулианы нэг хэсэг болж мэдэх юм.

Мөн МАН-ын одоогийн Удирдах зөвлөлд тун дургүй шахалт маягаар орсон гишүүд ч бий гэж эх сурвалж мэдээллээ.

    Өмнө МАН-ын Удирдах зөвлөлд орох гэж мөнгөтэй, нэртэй эрхэмүүд бөөн асуудал үүсгэдэг байсан. Гэтэл энэ удаа яагаад бултах болов гэдэг олон хүний анхаарлыг татаж эхэллээ. Яагаад намынхаа Удирдах зөвлөлөөс шударга гэсэн имижтэй эрхэмүүд татгалзах болсны нууц удахгүй тайлагдаж мэдэх юм.