Франц Улсын нийслэл Парис хотноо хуралдаж буй ЮНЕСКО-гийн Ерөнхий бага хурлын 37 дугаар чуулганд оролцохын зэрэгцээ Бүгд Найрамдах Франц Улсад ажлын айлчлал хийж буй Гадаад харилцааны сайд Л.Болд Франц улсад сурч, ажиллаж амьдарч буй монгол иргэдтэйгээ уулзлаа.

Уулзалтанд Гадаад харилцааны сайд Л.Болд Шинэчлэлийн Засгийн газраас Монгол Улсын нийгэм, эдийн засгийн чиглэлээр явуулж байгаа бодлого үйл ажиллагааны талаар, ялангуяа хилийн чанадад ажиллаж амьдарч буй монгол иргэдийн эрх ашгийг хамгаалах талаар баримталж буй чиглэл, зорилтын талаар дэлгэрэнгүй мэдээлэл хийв.Тэрээр Монгол Улсын иргэдийн гадаадад зорчих нөхцлийг хөнгөвчлөх, гадаадад байгаа Монгол Улсын иргэдийн эрх ашгийг  хамгаалах, консулын үйлчилгээг шуурхай, хүртээмжтэй болгох, гадаадын харьяат болсон Монгол Улсын уугуул иргэний эх нутагтаа зорчих, эх хэл, соёлоо сурах, нутагтаа ажиллах нөхцөлийг бүрдүүлэх, хүний наймаа, хар тамхи болон бусад онц ноцтой гэмт хэргийн золиос болсон иргэдэд туслалцаа үзүүлэх чиглэлээр тодорхой ажлыг тусган хэрэгжүүлж буй талаар дурдлаа.

Уулзалтын үеэр Гадаад харилцааны сайд Л.Болд иргэдийн сонирхсон асуултанд хариулж харилцан санал солилцов гэж Гадаад харилцааны яамнаас мэдээллээ.

ЮНЕСКО-гийн ерөнхий бага хурал эхэллээ. Монгол Улсын Гадаад харилцааны сайд Л.Болд энэ сарын 5-нд Франц Улсын Гадаад хэргийн сайд Л.Фабиустай уулзав.
Гадаад харилцааны сайд Л.Болд БНФУ-д ажиллах үеэрээ тус улсын  Парламентын доод танхим буюу Үндэсний Ассамблейн гишүүн, Үндэсний Ассамблей дахь Франц, Монголын найрамдлын бүлгийн дарга Жером Шартье, Францын Парламентын дээд танхим буюу Сенатын гишүүн, Сенат дахь Франц-Монголын найрамдлын бүлгийн дарга Ф.Пиле болон Сенатын бодлогын судалгааны бүлгийн гишүүд Жан Бессон, Яан Гайар, Жан-Рене Лесерф нартай уулзаж хоёр орны харилцаа, хамтын ажиллагааны талаар санал солилцов.