МАН дотооддоо зөрчил эхлүүлсэн шиг АН ч асуудалтай байна. Учир нь өчигдөр Монгол-Оросын хувь нийлүүлсэн “Улаанбаатар төмөр зам” нийгэмлэгийн ээлжит хурал болов. Хурлын хамгийн гол асуудал нь удирдлагыг солих байв. Гэвч АН-ын бүлэглэлүүдийн зөрчил хүчээ авч шийдвэр гаргаж чадалгүй УБТЗ-ын даргын үүрэг гүйцэтгэгч Г.Сэрээнэндоржийн бүрэн эрхийг дөрвөн сараар сунгав. Өнгөц харахад хоёр орны хувь нийлүүлсэн нэгэн аж ахуйн нэгжийн удирдлагын ажиллах хугацааг сунгаж байгаа юм шиг боловч өнгийж харвал АН-ын бүлэглэлүүд хоорондоо болоод хөрштэйгээ тохиролцож чадсангүй.

    УИХ-ын дарга З.Энхболд, Ерөнхий сайд Н.Алтанхуяг тэргүүтэй хүмүүс Д.Одхүүг УБТЗ-ын дарга болгох гээд зүтгүүлээд дийлээгүй аж. Д.Одхүүг “Алтангадас”, “Шонхор”, “МҮДН”, “Зүүн хойд ази”, “Kроун” зэрэг бүлэглэлүүд дэмжсэн байна. Тийм ч учраас Д.Одхүү “Би улс төрд ороод 23 жил болохдоо анх удаагаа олон сайхан хүний сэтгэлийн дэмжлэг ямар байдгийг харлаа. Баярлалаа” хэмээн хэлжээ. Түүний хэлдэгээр “анх удаагаа” намынхаа ихэнх бүлэглэлүүдийн дэмжлэгийг авч байгаа нь энэ аж. Харамсалтай нь ганцхан МоАХ буюу Х.Баттулга хориглон эсэргүүцжээ. АН доторх эдгээр ил бүлэглэлүүдийн үр дүнд УБТЗ нөлөө бүхий удирдлагатай болж чадсангүй. Өөрөөр хэлбэл АН-ын бүлэглэлүүд тохиролцоо хийхээр УБТЗ-ын удирдлагын асуудлыг түрдээ хойшлуулав. Энэхүү тохиролцооныхоо ард төрийн өмчит бусад үйлдвэрийн газрын дарга нарын асуудлыг ч нэгмөсөн ярих ёстой гэжээ. ТӨХ, асуудалтай байгаа “Хөтөл”-ийн цемент шохойн үйлдвэр зэрэг газрын удирдлагуудыг ч гэсэн бүлэглэлүүдэд хуваах ёстой гэж АН дотроо ярилцсан байна.
 
    Харин УБТЗ-ын дарга болно гэж бэлтгэлээ эртнээс хангаж суусан Д.Одхүү “Над шиг шулуун хүнийг хаа нэг газарт тавих нь эрсдэлтэй байдаг хэвэндээ. Ялаад ч нэмэр алга” хэмээн ярьж явна. Нэгэн цагт Ардчилсан холбоо эвсэл ялахад Уулын баяжуулах “Эрдэнэт” үйлдвэрийн захирал асан Ш.Отгонбилэгийн өрөөг эвдэж тамгыг нь хураан авч дуулиан дэгдээж байсан тэрээр энэ удаа намаа ялсан байхад бас л алба ахих гээд асуудалтай явна. Тиймдээ ч “нам ялаад ч нэмэр алга” гэж санаа алдсан байж мэдэх юм.

    Юутай ч гэсэн АН-ын доторх бүлэглэлүүдийн зөрчил туйлдаа хүрч төрийн өмчит газруудынхаа удирдлагуудыг солих дээр тохироо хийж чадахгүй байна.