Их, дээд сургуулийн оюутнуудад өгдөг Үндэсний тэтгэлэг буюу 70 мянган төгрөгийг олгох босгыг өндөрсгөх талаар УИХ-ын чуулганаар хэлэлцлээ. Оюутны тэтгэлгийг атестатчилагдсан, нийт төгсөгчдийн 50 хувь нь мэргэжлээрээ ажилладаг сургуулийн оюутнуудад олгох саналыг 50,9 хувийн саналаар дэмжлээ. Гэсэн МАН-ын гишүүд энэ саналыг эрс шүүмжилсэн юм.

   УИХ-ын гишүүн Н.Энхболд “Сургууль нь муу байлаа ч өөрөө хичээж, зүтгэж байгаа оюутнууд хохирох болоод байна. Өөр аргаар сургуулийн чанарыг сайжруулах боломж хайх хэрэгтэй” гэв. Мөн Ц.Нямдорж гишүүн “Энэ бол Ерөнхийлөгчийн өгсөн амлалт. Энэ дунд сургуулийн шалгуур гэж байгаагүй. Дараа нь хөдөлмөрийн хөлсний доод хэмжээгээр нэмж олгоно гэж байсан. Амласан бол түүндээ хүр. Нийт төгсөгчдийн 15 хувь нь мэргэжлээрээ ажилладаг гэсэн судалгааг Ё.Отгонбаяр гишүүн хэлж байна. Энэ шалгуураар тэтгэлэгт хамрагддаг сургууль байхгүй болно” гэж шүүмжиллээ.

   Тэгвэл С.Баярцогт гишүүн “Их, дээд сургуулиуд соёлтой Хадгаламж зээлийн хоршоо болчихоод байна. Багш нарын 80 хувь нь орон тооны байхыг шаардана. Дээрээс нь төгсөгчдийн 50 хувь нь ажлын байраар хангагддаг байхыг шаардана. Тэгж байж сургуулийн тоог цөөлнө. Бүх арав дугаар анги төгссөн хүхэд их, дээд сургуульд ордог өөр орон байхгүй. Малчид бүх малын ашиг, шимээ хүүхэддээ зориулж, хүүхдүүд нь сургуулиа төгсөөд ажлын байраар хангагддаггүй” гэсэн тайлбар хийлээ.

   “Ерөнхийлөгч оюутнуудад тэтгэлэг олгоё гэсэн концепц хэвээрээ байна. Хасъя гээгүй шалгуур тавъяа гэж байна. Онц сурсан оюутан яагаад 200 мянган төгрөг авч болохгүй вэ? Бүгдийг улс төржүүлж, үгүйсгэхээ боль” гэж Д.Эрдэнэбат гишүүн ундууцав.  
   Ямартаа ч их, дээд сургуулиудад төгсөгчдийн тодорхой хувь нь мэргэжлээрээ ажилладаг байх шаардлагатай гэсэн шалгуурыг дэмжлээ. Гэхдээ дараагийн хэлэлцүүлгээр "50 хувь" гэсэн босгыг багасгах тал дээр АН болон МАН-ын бүлгүүд зөвшилцлөө.

   Хэрэв 70 мянган төгрөгийг олгоход дээрх шаардлагыг тавибал Мэргэжил сургалт үйлдвэрлэлийн төвүүдэд суралцагчдын 45 мянган төгрөгийг 70 мянга болгох төсөвт шилжүүлэх юм.