МАН-ын шинэчлэлийн хорооноос намын шинэ дарга, нарийн бичгийн дарга, Бага хурал болон Удирдах зөвлөлийн гишүүдийг сонгосон МАН-ын 27-р Их хурлын үр дүнгийн талаар мэдээлэл өглөө. Энэ үеэр Шинэчлэлийн хорооны Бодлогын зөвлөлийн дарга Т.Аюурсайханаас зарим зүйлийг тодрууллаа.

-МАН 27 их хурал хуралдаад өндөрлөлөө. Шинэчлэлийн хорооны зүгээс хэрхэн дүгнэж байна?
-Шинэчлэлийн хорооны зүгээс 2012 оны зургаадугаар сард анх байгуулагдсан цагаасаа эхлээд, 21 аймаг, нийслэлийн зургаан дүүргүүдэд ажиллаж МАН-ын жирийн гишүүд, дэмжигчид, ард иргэдээс саналыг нь тусгасны үндсэн дээр бодлого шинэчлэлийн хөтөлбөрөө боловсруулсан байгаа.  Энэ хөтөлбөрт туссан намын дүрмийн өөрчлөлт, хөтөлбөрийн өөрчлөлт болон намын үйл ажиллагааны шинэчлэлийн үндсэн чиглэлүүд манай их хурлаас батлагдсан байгаа. Ингээд бидний тавьж байсан баримт бичгийн үндсэн дээр 70 орчим хувь нь тусч санал авсан. Бид цаашдынхаа үйл ажиллагааны зохион байгуулалтанд ороод төлөвлөгөөг гаргаад ажиллаж байна. Шинэчлэлийн хороо үйл ажиллагаа явуулсан хэвээрээ байгаа. МАН-ын их хурал шинэчлэлийн үйл явцын зөвхөн нэг шат нь байв. Намын жирийг гишүүд, дэмжигчид шинэчлэлийн хорооноос энэхүү шинэлчлэлээ жинхэнэ утгаар нь туушдаа хийгээрэй гэж захисан байгаа. Тиймээс бид цаашдаа Их хурлаас гарсан бодлого шийдвэрүүд амьдрал дээр биелэлээ олж, үйл ажиллагааны шинэчлэл, арга барил, сэтгэлгээний шинэчлэл гаргах энэ тал дээр ажиллана. Их хурлаас гарсан шийдвэрүүдийн хувьд бид олон нийтээс асуух ёстой гэж үзэж байгаа. Заал яаж дүгнэж байгаа нь нэг хэрэг. Олон нийтийн шалгуур хамгийн чухал. Тийм учраас бид олон нийтээс намын шинэчлэл, Их хурдлыг яаж харж байна, цаашдаа хэрхэн ёстой вэ гэдэг дээр томоохон социологийн судалгаа явуулна. Намын шинэчлэлийн үйл явцад бид Шинэчлэлийн хорооны зүгээс эрдэмтэн, судлаачидтай хамтарч хяналт шинжилгээ, мониторинг хийж ажиллана.

-Их болон Бага хуралд Шинэчлэлийн хорооны хэчнээн гишүүд төлөөлөгчид оролцсон бэ?
-Төлөөлөгчдөөс аймаг орон нутаг болон нийслэлээс олон хүн оролцсон. Төлөөлөгчдийн 30 орчим хувь гэж хэлж болно.

-Намынхаа шинэ удирдлагуудаасаа юуг хүсч, хүлээж байна вэ?
-Шинэчлэлийн хороо намын зөвхөн дотоод шинэчлэлээс гадна ард иргэдэд тулгамдсан асуудал, нийгэмд эдийн засгийн бэрхшээлтэй асуудлууд дээр иргэдийнхээ дуу хоолой болж ажиллах ёстой гэж үзэж байгаа. Тиймээс бид намынхаа шинэ удирдлагууд, удирдах зөвлөлөөс тодорхой зүйлийг шаардаж ажиллана. Намын удирдлагууд болон удирдах зөвлөл, намын их болон бага хурлуудаар сонгогдож гарсан удирдлагуудаа бид ажиллах боломжийг нь олгож ажиллах ёстой. Зөвийг нь дэмжиж хамтарч ажиллах хэрэгтэй юм. Бурууг нь сануулж, анхааруулж ажиллах юм. Тэгэхээр юуны өмнө намын удирдлагууд болон бид одоо албан тасалгаанд сууж ажиллаж цаг нь биш. Бид ард түмний дунд орж ажиллах ёстой. Намын гишүүдтэйгээ уулзах ёстой. Их хурлынхаа бодлого шийдвэрийг таницлуулах хэрэгтэй. Дүүргүүд болон 21 аймагт ажиллаж ард иргэдээс саналыг нь асуух чухал. Зөвхөн намын дотоод шинэчлэлтээс гадна ер нь улс орны нийгэм эдийн засгийн байдал ийм хүнд байхад ард иргэдийнхээ тулгамдсан асуудлуудыг шийдвэрлэхийн тулд хүчтэй сөрөг хүчин болж ажиллах ёстой гэж үзэж байгаа. Ард түмэн сөрөг хүчин болно гэж манай намд сонголтоо хийсэн байгаа. Тиймээс засгийн газарт орох асуудал бол байж болохгүй. Түүнчлэн 2014 оныг байгууллагыг бэхжүүлэх жил болгон зарлах ёстой гэж үзэж байна. Олон нийт болоод жирийн гишүүдтэйгээ уулзах тогтмол цагийг гаргаж байх хэрэгтэй. Намын эв нэгдлийг бүх шатанд хангах ёстой. Манай байгууллагын санхүүгийн талаас нь ч гэсэн, үйл ажиллагааны арга барил өөрчлөлтийн зүгээс ч гэсэн бэхжүүлэх ёстой гэж үзэж байна.

-Засгийн газарт орох асуудал байж болохгүй гэдгийг тайлбарлаач?
-Энэ хүндрэл бэрхшээлтэй, эдийн засгийн буруу бодлого явж байхад хариуцах эзэн байх ёстой. Бүгд засгийн газарт орохоор хариуцах эзэнгүй болно. Эх баригдчын зүгээс анхнаасаа их хурлыг байгуулахдаа нэг намын давамгайлсан бодлогоор бүх шийдийг гаргахаар ажилласан. Гэвч энэ цаг хугацааны нөхцөл байдалд аливаа нэг талыг баримталсан шийдвэр бүр алдаатай болдог. Аливааг зөвшилцөж байж гаргасан шийдвэрүүд алдаа багатай болдог. Тиймээс цаашдын үйл явц зөвшилцлөөр явах шинэчлэл гэж ойлгож байгаа. Засгийн газрын үйл ажиллагааны буруутай бодлого нь амьдрал дээр харагдаж байна. Энэ нь цаашдаа даамжирна. Тиймээс Шинэчлэлийн хорооны зүгээс анхааруулж хэлэх нь зүтэй. Тиймээс бид хүчтэй сөрөг хүчин болж ард иргэдийнхээ дуу хоолой болж ажиллах ёстой гэсэн шаардлагуудыг шинэ удирдлагууддаа тавьж ажиллана. Шинэчлэлийн хорооны зүгээс их хурлын бодлого шийдвэртэй уялдуулж намын санхүүжилт, хүний нөөцийн журмыг батлах ёстой гэж үзэж байгаа. Үүн дээр ч гэсэн бид намынхаа удирдлагуудтай хамтарч ажиллах болно.

-Цаашдаа Шинэчлэлийн хороо юунд анхаарч ажиллах вэ?
-Цаашдаа Шинэчлэлийн хороо намын анхан шатны гишүүдтэйгээ улам ойр ажиллах болно. Мөн олон нийттэй ойрхон ажиллана. Түүнчлэн Шинэлчлэлийн нэгдсэн хөдөлгөөн татан буугдсанаа мэдэгдсэн байгаа. Энэ хөдөлгөөн 2013 оны долдугаар сард байгуулагдаад гурван сар үйл ажиллагаагаа явуулаад татан буугдлаа. Тус хөдөлгөөний гол зорилго бол намын Бага болон Их хурлыг зарлан хуралдуулах зорилготой байсан. Шинэчлэлийн хороо бол тусдаа. Их хурлын үйл явцад бол үнэхээр Шинэчлэлийн хорооны зүгээс намын жирийн гишүүдийнхээ болон олон нийтийн намаас хүсч хүлээж байгаа энэ шийдвэрүүдийг тусгуулахын төлөө туушдаа ажилласан гэдгийг нийтээрээ харсан учраас Шинэчлэлийн хорооны бүрэлдэхүүн улам өргөжиж байна. Гишүүд дэмжигчид маань улам их болж байна.

-Цалин тэтгэврийг нэмэх асуудлыг ярьж байна. Энэ дээр ямар байр суурьтай байна?
-Цалин, тэтгэвэр аль альныг нь нэмэх ёстой. Бараа бүтээгдэхүүний үнэ улс орны хэмжээнд өсч байна. Цаашдаа ч өсөх хандлагатай байна. Гэтэл цалин тэтгэвэр тэтгэмж огт нэмэгдэхгүй байгаа. Үнэхээр ард иргэдийн амьдрал хүн байна. Тиймээс нэмэгдүүлэхийг ард иргэд, улс орны хэмжээнд хүсч байна. Тийээс үүнийг бараа бүтээгдэхүүний өсөлттэй уялдуулаад нэмэх ёстой.