Өнгөрсөн нэг жилийн хугацаанд маргаантай байсан Увс аймгийн сонгуулийн хэрэг шүүхээр эцэслэгдсэн бөгөөд шүүхээс тус маргааныг Сонгуулийн ерөнхий хороо /СЕХ/ эцэслэн шийдэх ёстой гэсэн шийдвэрийг гаргасан талаар АН-аас мэдэгдсэн билээ.

Тиймээс АН-аас нэр дэвшигчид СЕХ-нд өнгөрсөн есдүгээр сарын 13-нд гомдол гаргасан бөгөөд СЕХ-оос одоог болтол энэ асуудалд ямар нэгэн хариу өгөөгүй байгаа юм. Уг асуудлын талаар АН-ын Ерөнхий нарийн бичгийн дарга Ц.Оюундариас тодрууллаа.

-    Увсын сонгуулийн маргааныг Сонгуулийн Ерөнхий хороо эцэслэн шийдвэрлэнэ гэсэн дүгнэлт гарсан байгаа. Энэ асуудал юу болж байгаа вэ?

-    АН-аас өнөөдөр эсвэл маргааш СЕХ-нд хандаж өргөдөл өгөх гэж байгаа. Ер нь өргөдөл өгөөгүй тохиолдолд СЕХ асуудлыг авч хэлэлцэх боломжгүй юм байна. Бид өмнөнь дөрөвдүгээр сард СЕХ-нд өргөдөл өгч байсан. Яг тухайн үед шүүхийн шийдвэр эцэслэн гараагүй байсан учир тэр өргөдөлд хариу өгөх боломжгүй байсан. Одоо бол шүүхийн шийдвэр эцэслэн гарсан учир АН-ын зүгээс өргөдлөө өгөх гэж байна.

-    Өргөдөл өгснөөс хойш хэр хугацаанд асуудлыг шийдвэрлэх бол?

-    30 хоногийн дотор шийдвэрлэнэ. Дахин шалгах шаардлагатай бол хоёр сарын хугацаа байгаа.

-   АН эрх барьж буйгаараа түрий барьж СЕХ-г дарамталж байна гэсэн яриа байгаа? Үүнд та ямар тайлбар хийх вэ?

-    СЕХ бол шүүх байгууллагтай ижил. Энэ бол улс төрөөс хараат бус байх ёстой. Эрх барьж байгаа нам СЕХ-г нөлөөндөө байлгадаг тогтолцоо өмнө нь байсан. Баттулга даргыг та бүхэн мэдэж байгаа байх. Тэр хүн их нөлөөнд орж, ямар их хууль бус шийдвэрүүдийг гаргадаг байсан билээ. Тэгэхээр үүн шигээ сэтгээд байх шиг байна. АН бол үүнийг хамгийн их шүүмжилдэг. Тиймээс бид шүүмжилдэг байсан зүйлийнхээ эсрэг үйл ажиллагаа явуулахгүй гэдэг үүднээс бид ил тод, хэвлэл мэдээллийнхэнтэй хамт шаардлагуудаа тавьж байгаа. Түүнээс биш бид нар хөшигний цаана уулзаж, үүрэг даалгавараа өгөөгүй. Бид ийм зарчмыг цаашдаа хэрэгжүүлж ажиллах учраас бүх зүйлийг хуулийн дагуу хийх болно.