МАН-ын Бага хурлын гишүүдийн бүтэц олон нийтийн анхаарлыг ихээхэн татаж байна. Учир нь одоогийн МАН-ын Бага хуралд маапаантай олон хүн орж ирсэнээс гадна нөлөө бүхий хүмүүсийг ч хоморголон гаргажээ.

    Интерполоор эрэн сурвалжлагдаж, одоо шалгагдаж байгаа НИТХ-ын дарга асан Т.Билэгт Говь-Алтай аймгаас Бага хуралд орсон байна. Сонирхолтой нь Өмнөговь аймгаас өмнө Бага хуралд байсан Засгийн газрын хэрэг эрхлэх газрын дарга асан Б.Долгор хэмээх эмэгтэйг хасчихжээ. Гэхдээ намд мөнгө өгөхгүй гэсэн үндэслэлээр Бага хурлаасаа гаргажээ. Өөрөөр хэлбэл 1600 гаруй хүнийг хохироосон хүнийг авч оронд нь шударга мөрөөрөө ажиллаж байсан нэр цэвэр сайд асан эмэгтэйг хасч байгаа МАН-ын бодлогыг ойлгоход ихээхэн төвөгтэй юм. Хадгаламж зээлийн хоршоо байгуулж иргэдийг хохироосон мөнгөө одоо болтол төлөхгүй байгаа хүнийг намд мөнгө өгдөг гэсэн шалгуураар авах нь хэр зэрэг шударга вэ гэсэн асуудал ард түмний дунд гарч байна.

    Үүний зэрэгцээ МАН-ыг нэгэн цагт удирдаж явсан Г.Очирбат гуайг Бага хурлаасаа хасчээ. МАН-ын бүх үеийн удирдлагыг оруулсан мөртлөө Г.Очирбат гуайг ямар шалгуураар хассаныг тайлбарлахад төвөгтэй юм. Мөн шударга нэр цэвэр гэгдэж ирсэн Д.Мөнхөө гуайг ч чөлөөлсөнд олон эмэгтэйчүүд гайхаж байгаа аж. “Петровис”-ийн ТУЗ-ийн дарга Ж.Оюунгэрэл, БСШУ-ны сайд асан Н.Болормаа, Ө.Энхтүвшингийн ахлах зөвлөх, Унгарт элчин сайдаар ажиллаж байсан О.Эрдэнэчимэг зэрэг хүчирхэг эмэгтэйчүүд бодлогын гадна үлджээ. Зарим хүмүүсийн М.Энхболд дарга Н.Болормааг Бага хурлаас гаргаж “хариу”-гаа авч байгаа гэх тайлбар ч газар авч байна.

    Мөн эх сурвалжийн мэдээлж байгаагаар бол Э.Золбоот хэмээх намын анхан шатнаасаа ажиллаж байсан залууг Ө.Энхтүвшингийн хүү гэдэг шалгуураар Бага хурлаасаа “delete” хийжээ. Нэгэн цагт МАН-ын нарийн бичгийн дарга хийж алдаа оноог дэнсэлж явсан элчин сайд асан Б.Энхмандахыг Их, Бага хурлынхаа алинд ч оруулаагүй байна. Учир нь Их хуралд орох гэхэд нь Сүхбаатар дүүргийн намын хорооны дарга Г.Төмөрбаатар гэгчийн “хор”-оор сонгуулаагүй байна. Мөн Ерөнхий нарийн бичгийн даргад нэр дэвшинэ гээд байхад нь хүртэл Бага хуралдаа сонгоогүй аж. Энэ мэтээр МАН-ын Бага хурлын бүрэлдэхүүний асуудал дуулиан тарьсаар байна.