Саяхан удирдлагаа сольсон МАН-ын дотоодод олон үйл явц өрнөж байна. Намын газар хэлтэсүүдийнхээ даргыг томилж шинэчлэлийн гэх бодлогоо олон нийтэд хүргэх л үлдсэн. Гэвч шинэ удирдлагатай болсон МАН-ын өмнө олон сорилтууд бий боллоо. Учир нь УИХ дахь цөөнхийн бүлгийн зөвлөх Б.Лхагважав тэргүүтэй хүмүүс ажлаасаа сайн дураараа татгалзаж байгаагаа зарласан. Бас хамтарсан Засгийн газар байгуулж оролцвол үзэлцсэн шиг үзнэ гэж “Шинэчлэлийн хороо”-ныхон мэдэгдсэн. 

    Тэгвэл энэ бүхнээс илүү ноцтой нэгэн үйл явц МАН-ын дотоодод өрнөж байгааг эх сурвалж мэдээллээ. Энэ бол хэсэг сэхээтнүүд, нэр нөлөө бүхий эрдэмтэд МАН-аасаа гарч МАХН-д элсэж Н.Энхбаярыг бараадахаар ярилцаж эхэлсэн байна. Хэрэв энэ үнэн бол МАН-аас эрдэмтэд зайгаа барьж эхэлж байгаа аж. Ингэх хэд хэдэн учир шалтгаан бий гэж эх сурвалж тайлбарлав. Учир нь МАН-ын шинэхэн дарга М.Энхболд гадаадад сургууль төгссөн боловсролтой хүмүүсийн талаар таагүй яриа өгсөн нь эрдэмтэдийг жихүүцүүлэх нэг шалтгаан болсон бололтой. Бас МАН-ын шинээр бүрдүүлсэн Бага хуралд эрдэмтэдийн эзлэх хувийг ч багасгасан сурагтай. Мөн Н.Энхбаяр хэзээнээсээ сэхээтнүүдийг татаж, намаа ч, өөрийгөө ч хүрээлүүлж байсан нь эрдэмтэдийг санагалзахад хүргэсэн аж. Энэ бүх сонирхолын уулзвар эрдэмтэдийг сонголтоо эргэж харахад хүргэсэн байж мэдэх юм.

    Хамгийн сонирхолтой нь МАН-аас эрдэмтэдийг урвуулах ажлыг хэн зохион байгуулж байна вэ? гэсэн хардлагын эзнээр Б.Энхмандахыг нэрлэж байгаа аж. Нэгэн цагт МАН-ын нарийн бичгээр ажиллаж дэд сайд, элчин сайд болж явсан энэ эрхэмийг сэхээтнүүдтэй хэл амаа амархан ололцдог оюунлиг эрхэм гэж намынхан нь ярилцаж байна. Сонирхолтой нь ийм чухал хүнээ МАН бодлогынхоо гадна үлдээсэн алдаа болж эхэлжээ. Учир нь Б.Энхмандахыг Их хурлын төлөөлөгчөөр сонгогдох гэхэд нь МАН-ын “хотын” хэмээх бүлэг Сүхбаатар дүүрэгт унагасан юм. Бас Бага хурлын гишүүн болох гэхэд нь бас л хотынхон “за” гэж хэлээгүй. Тэрээр нилээд олон хоногийн өмнөөс МАН-ынхаа Ерөнхий нарийн бичгийн даргад өрсөлдөхөөр удирдлагуудтайгаа уулзаж, хэвлэлээр байр сууриа илэрхийлж байсан юм. Гэтэл  Ерөнхий нарийн бичгийн даргад өрсөлдөнө гээд байхад нь Бага хуралдаа ч оруулахгүй байгаа нь МАН-ынхны бодлого хаана явааг илтгэн харуулна. Арга ядсан Б.Энхмандах Бага хурал хуралдаж байхад намын байрныхаа гадна ганцаараа сууж байгаад Ерөнхий нарийн бичгийн даргын асуудал яригдахад орж юу хийх, яаж ажиллахаа товчхон илэрхийлээд гарч явсан гэдэг. Өөрөөр хэлбэл түүнд намын гишүүд, Бага хурлынхантай ажиллах ямар ч боломжийг МАН-ын одоогийн удирдлага олгоогүй юм. МАН-ын түүхэнд Ерөнхий нарийн бичгийн даргад өрсөлдөнө гэж мэдэгдсэн хүнээ хэзээ ч ингэж бодлогын гадна үлдээж басч байгаагүй. Тэгвэл бодлогын гаднаа үлдээж аль ч хуралдаа оруулаагүй Б.Энхмандах намаасаа нүүр буруулж урьдын дарга цэрэг явсан Н.Энхбаярыг бараадахаар шийдсэн бололтой. Хэрэв үнэн бол тэрээр ганцаараа МАН-аас явчихгүй аж. Нилээд нөлөө бүхий эрдэмтэдийг дагуулаад өөрийгөө хэн байсныг харуулахаар шийдсэн бололтой.

    Энэхүү үйл явц батлагдаж, МАН-аас гарах дараагийн ээлж эхэлж байгаа бол энэ намын ирээдүй тун бүрхэг харагдаж эхэллээ.