Өнөөдөр МАХН-ын залуус намын байрандаа “Шар нунтгийн тарчлаан” нэртэй пантомимо хэлбэрийн хэвлэлийн хурлыг хийлээ. Тус намын залуус Монголд уран олборлох ажлыг эрс эсэргүүцэж байгаагаа илэрхийлэн энэхүү ажлыг зохион байгуулжээ. Тэдний хэлж буйгаар өнгөрсөн сарын 26-нд Гадаад хэргийн сайд Л.Болд Францын Гадаад хэргийн сайдтай “Хувьцаа эзэмшигчдийн гэрээ” гэгчийг үзэглэж Монгол улсад Уран олборлох ажлыг эхлүүлсэн гэнэ.

 Энэхүү гэрээ нь монголчуудын аюулгүй байдалд заналхийлсэн гэрээ боллоо гэж тэд онцолсон юм. Мөн тус гэрээг үзэглэхэд манай улс төрийн томоохон албан тушаалтнууд ихээхэн үүрэг гүйцэтгэсэн хэмээн тэд хэлж байна.

Тодруулбал, С.Баяр, С.Батболд, Н.Алтанхуяг, З.Энхболд, Л.Болд, Н.Тэгшбаяр, Мон-Атом компаний захирал асан, Гадаад харилцааны яамны Төрийн нарийн бичгийн дарга Г.Цогтсайхан, Мон-Атом компаний захирал асан Р.Бадамдамдин нар уран олборлох гэрээнд идэвхтэй оролцсон гэв.  Мөн “Үндэсний аюулгүй байдлын гурван гишүүн гурвуулаа энэ гэрээг байгуулах гэж улайран зүтгэж байгааг харахад ард түмэн бид хэндээ итгэж найдах юм бэ. Монголын бүх ард түмнээс сонгогдсон Ерөнхийлөгч хүртэл ард түмнийхээ талд ганц ч үг дуугарахгүй байгаа нь нам, бүлгийн эрх ашгийн талд байна гэсэн дүгнэлтэнд өөрийн эрхгүй хүргэж байна. Иймд энэхүү гэрээг УИХ-аар соёрхон батлахгүй байхыг уриалж байна” гэсэн юм.

Харин МАХН-ын Ерөнхий нарийн бичгийн дарга Г.Шийлэгдамба энэ тухай “Би ч мөн адил та бүгдтэй адил сонирхож харж байна. Ер нь уул ус, байгаль орчинтой холбоотой асуудал хамгийн чухал юм. Тэгэхээр байгаль орчны чиглэлээр үйл ажиллагаа явуулдаг ТББ-ууд урантай холбоотой байр сууриа илэрхийлсэн арга хэмжээ зохион байгуулж байна. Үүнд Монгол улсын иргэд санал бодлоо нэгтгэх хэрэгтэй. Манай төр засгийн удирдлагууд энэ байдлыг анхааралдаа авах хэрэгтэй биз. Энд ямар нэгэн улс төрийн үйл ажиллагаа байхгүй. МАХН та бүхэнтэй адил байдлыг хөндлөнгөөс ажиглаж байна” гэсэн юм.