МАН-ын Ерөнхий нарийн бичгийн дарга Ж.Мөнхбат намын шинэ бүтэц, бүрэлдэхүүнийг өнөөдөр танилцууллаа. Намд боловсон хүчний шинэчлэл эхэлж, Удирдах зөвлөлийн хурлаар намын шинэ бүтэц, бүрэлдэхүүнийг баталж, боловсон хүчнийг томилжээ. Тэдний хувьд цомхон баг бүрэлдэхүүнээр ажиллахаар болсон байна. Тодруулбал, өмнө нь нэг газар, дөрвөн хэлтэс, хоёр албатай ажилладаг байсан бол шинэ бүтцээр зургаан газар болгон өөрчилсөн байна. Намын байгуулалт, Стратеги төлөвлөлтийн газрын даргаар А.Ариунзаяа, Олон нийт, хэвлэл мэдээлэл, технологийн газрын даргаар Н.Дэмбэрэл, Сан хөмрөгийн газрын даргаар Ж.Тамир, Эрх зүй, аюулгүй байдлын газрын даргаар Ш.Раднаасэд, Эдийн засгийн хөгжлийн бодлогын газрын даргаар Д.Даваасүрэн, Нийгмийн бодлогын газрын даргаар С.Чинзоригийг томилжээ. Тэдний хувьд залуу боловсон хүчин тэдгээрийн оролцоотойгоор МАН үйл ажиллагааны шинэчлэлээ шинэ шатанд гаргана гэж үзэж байгаа аж. Мөн МАН-ын шинэ удирдлага албан тасалгааны цонхоор бус ардын дунд орж ажиллана гэлээ. Ж.Мөнхбат шинээр томилогдож буй газрын дарга нараар өндөр боловсрол, мэдлэгтэй, ажлын дадлага туршлага сайтай хүмүүсийг сонгосон гэсэн юм.

Намын шинэ удирдлагууд намынхаа бодлогын болоод, боловсон хүчний бүтцийн шинэчлэлийг хийж эхлээд байгаа нь энэ аж. Цаашлаад процесын шинжтэй олон шинэчлэлийн ажлыг хийнэ гэдгээ МАН-ын Ерөнхий нарийн бичгийн дарга Ж.Мөнхбат хэлсэн юм.

Үүнээс гадна долоо хоног бүрийн мягмар гаригийн 15.00 цагт Тусгаар тогтнолын ордноо иргэд сонгогчидтойгоо нээлттэй уулзалт хэлэлцүүлэг зохион байгуулахаар болсон байна. Уг өдрийг МАН нээлттэй өдрөөр зарлаж байгаа аж.

Хэвлэлийн хурлын үеэр МАН-ын Ерөнхий нарийн бичгийн дарга Ж.Мөнхбат сэтгүүлчдийн асуултад хариуллаа.

-    Намын даргын дэргэд зөвлөхүүдийн танхим ажиллана. Зөвлөхүүдээр ямар хүмүүс ажиллах вэ?

-    МАН-ын дарга болон Ерөнхий нарийн бичгийн дарга, Ерөнхийлөгч, УИХ-ын дарга, Ерөнхий сайдаар ажиллаж байсан хүмүүс албан бусаар зөвлөмж гаргах байдлаар намын үйл ажиллагаанд оролцоод явна. Д.Содном гуай, Гунгаадорж,  Н.Багабанди, Ө.Энхтүвшин гэсэн 10 гаруй хүн багтаж байгаа.

-    Намын М.Энхболд дарга бүлэг, удирдах зөвлөлийн алиныг нь удирдахаар болсон бэ?

-    Энэ асуудлыг бид дотооддоо шийдвэрлэнэ.