УИХ дахь Ардчилсан намын бүлэг  өнөөдөр ээлжит хуралдаанаа хийж хоёр үндсэн асуудлыг хэлэлцлээ. Бүлгийн хуралдааны эхэнд Монгол Улсын Ерөнхий сайд Н.Алтанхуягийн мэдээллийг сонслоо. Энэ сард  ирэх онд  хийгдэх томоохон ажлуудын бэлтгэл ажлыг хийх шаардлагатай гэж Ардчилсан намын бүлгийн гишүүд үзэж байгаа юм. Тийм учраас ирэх жил хийгдэх томоохон ажлуудын нэг болох  төмөр зам болоод автозамын  талаар  баримтлах бодлогыг тодорхой болгож, бүлгийн гишүүдэд танилцуулах үүргийг Засгийн газарт даалгалаа.

Мөн өнгөрсөн жилийн хугацаанд манай улсын хувьд дэд бүтцийн ажил нэлээд хийгдсэн.Цаашид ч мөн эдийн засгийн бодлогыг тэлэхэд  төмөр зам, автозамын  цэгцтэй болоод шуурхай бодлого шаардлагатай  хэмээн Ардчилсан намын бүлгийн гишүүд санал нэгдэв. Тухайлбал,  Туул-Сэлбэ голын дагуу баригдаж буй хурдны замын ажлыг дуусгаснаар Улаанбаатар хотын түгжрэлийг сааруулахад  ач холбогдолтой гэж үзэж байгаа юм.

 Үүнээс гадна  Алтанбулаг-Замын –Үүдийг холбох олон улсын хурдны автозамын барилгыг эхлүүлэх гэж байгаатай холбогдуулан энэ сарын дундуур болох Монгол Улс, ОХУ-ын Засгийн газар хоорондын комиссын хуралдаанаар асуудлыг хэлэлцэх нь зөв гэж бүлгийн гишүүд үзэв.

Харин орон нутгийн замын тухайд хэд хэдэн аймгийн төвийг Улаанбаатар хоттой холбосон гээд өнгөрсөн нэг жилийн хугацаанд чамлахааргүй ажил хийгдсэн.  Тиймээс өмнө нь мөнгө санхүү, тоонд илүү анхаардаг байсан бол одоо замын чанар, стандартыг эргэж харах шаардлагатай байгаа талаар бүлгийн гишүүд байр суурь нэгдлээ.

Өрийн удирдлагын тухай хуулийн төслийг  өргөн барихыг  даалгалаа

Бүлгийн хуралдааны үеэр Монгол Улсын эдийн засаг өргөжин тэлэхийн хэрээр Улсын өрийн ил тод байдлыг хангасан эрх зүйн зохицуулалтыг боловсронгуй болгох шаардлага тулгарч байгаа аж. Тиймээс Засгийн газрыг Өрийн удирдлагын тухай хуулийн төслөө ойрын хугацаанд УИХ-д өргөн мэдүүлэхийг даалгалаа.

Эдийн засаг хөгжлийн яам болон Сангийн яамны зүгээс  боловсруулсан төслөө Ардчилсан намын бүлэгт танилцуулах үүргийг мөн өгсөн юм.

Харин Монгол Улсын 2014 оны төсвийн төслийн  хэлэлцүүлэг ахицтай явж байна. Өнгөрсөн хоёр долоо хоногийн хугацаанд ажлын хэсгүүд эрчимтэй ажилласан.Урсгал зардлыг бууруулах ажил шийдэгдсэн. Эндээс хэмнэсэн мөнгө эргээд орон нутгийн хөгжил рүү чиглэгдэх шаардлагатай гэдэгт бүлгийн гишүүд санал нэгдэв. Үүнд “Шинэ сум” төслийг хэрэгжүүлэх хүрээнд тодорхой хөрөнгийг шийдэж  өгөх хэрэгтэй. Мөн хөгжлийн банкны санхүүжилтээр аймгийн төв бүрийг орон сууцжуулах ажлыг шийдвэрлэх  хэрэгтэй  хэмээн бүлгийн гишүүд үзлээ. Түүнчлэн хүүхдийн эмнэлэг боловсролын талаархи  шинэ төсөл хөтөлбөрийг дэмжье гэсэн саналыг ч бүлгийн гишүүд хэлж байсан юм.

Бүлгийн хуралдааны дараа бүлгийн дарга Д.Эрдэнэбат сэтгүүлчдийн асуултад хариулт өглөө.

-Төмөр замыг  ямар царигаар барих вэ?

-Засгийн газрын оруулж ирсэн саналд тулгуурлан өргөн нарийн байх тухай асуудлыг хэлэлцэнэ.

-Царцаасан төслүүдийг тодотгох байдлаар шийднэ гэсэн. Тухайн үед тодотгол хийх хууль эрхзүйн орчин бий юу?

-2014 онд суух ёстой зарим төслүүдийн санхүүжилтийг царцаахаар шийдвэрлэсэн байгаа.Тиймээс 2014 оны төсөвт тэдгээр байгууламжийн нэр нь бичигдээд үнийн дүн нь тэглэж  сууна. Аудитын дүгнэлт гарсны дараа оруулах ёстой байгууламжуудыг  оруулах нь зөв.