Ерөнхий сайд асан Р.Амаржаргал УИХ-ын гишүүнээсээ татгалзсан нь шинэ дуулиан болов. АН-ынхаа удирдлагатай таарамж муутай байсан тэрээр өмнө ҮЗХ-ноосоо татгалзах хүсэлтээ илэрхийлсэн ч Ховд аймгийн Ардчилсан нам хүлээж аваагүй. Харин энэ удаагийн хүсэлтийг УИХ хүлээж авах байдал үүсэв. Эсвэл АН түүнтэй тохироо хийгээд өргөдлийг нь татуулж мэдэх юм. АН-ын дарга Н.Алтанхуягийг намынхаа бүлэглэлүүдийн дунд зуучин үүрэг сайн гүйцэтгэдэг, гишүүдийнхээ арга эвийг олоод байдаг гэсэн мессэж явсаар ирсэн. Ганцхан Р.Амаржаргалын л арга эвийг л олж чадахгүй байсан бололтой.

    Харин өчигдөр Р.Амаржаргал УИХ-ын гишүүнээсээ татгалзсан нь нилээд том маргааны сэдэвийг бий болгов. Хамгийн түрүүнд “Хас”-ын хэмээх овогтой Ч.Ганхуяг цахим ертөнцөөр баяр хүргэв. Тэрээр “Амаржаргал гишvvнд цаашдын ажил амьдралд нь сайн сайхан бvхнийг хvсье. Та зоригтой алхам хийлээ...” хэмээн бичсэн юм. Р.Амаржаргалын амьдралд сайн сайхныг хүсч, эр зоригийг нь магтан дуулсан түүний бичлэг олон хардлагыг бий болгов. Учир нь Р.Амаржаргалыг хүсэлтийг УИХ ёсоор болговол Ч.Ганхуяг гишүүн болох магадлалтай юм. Тийм ч учраас Ч.Ганхуяг хамгийн түрүүнд баяр хүргэсэн байх. Өмнө У.Хүрэлсүхийг татгалзахад Д.Сарангэрэл автоматаар гишүүн болсон жишиг бий.

    Гэвч хуульчид Ч.Ганхуягийг бүхнээс түрүүнд баярлах хэрэггүйг сануулж байна. Учир нь У.Хүрэлсүх листээр гишүүн болсон. Харин Р.Амаржаргал тойргоос сонгогдсон юм. Тэгэхээр дахин сонгууль явуулна гэсэн үг. Энэ тухай Хууль зүйн сайд Х.Тэмүүжин “Энэ тохиолдолд өмнөх сонгуульд дараагийн хүн нь хэдэн санал авсан хамаагүй ээ. Нөхөн сонгууль хийнэ” хэмээн тайлбарлав. Мөн УИХ-ын гишүүн О.Баасанхүү “Хуулиар тойргийн гишүүн больсон тохиолдолд зөвхөн дахин сонгууль болно. Сонгууль дууссан учраас 28 хувь хамаагүй. МАНАН тохироо бүр хамаагүй” хэмээн асуудлаас хоцролгүй байр сууриа илэрхийлэв. Хууль зүйн сайд, УИХ-ын хуульч гишүүдийн тайлбараар бол зөвхөн нөхөн сонгууль л явагдах аж. “Хас”-ын Ч.Ганхуягийн баярлаж хандарсан нь бас эртэдсэн хэрэг болов.

    Сонирхолтой нь үйл явдлын эзэн Р.Амаржаргал энэ долоо хоногтоо багтаад яагаад УИХ-ын гишүүнээсээ татгалзах болсон талаараа хэвлэлийн бага хурал хийнэ гэж зар тараасан. Тэрээр бусдын яриад байгаа шиг АН-ын зөрчил, парламентын уналтыг илчилсэн үйлдэл хийсэн үү? гэх мэт тодорхой асуултуудад илэн далангүй хариулах аж.

    Манай улсад парламентын гишүүнээсээ татгалзаж байсан нилээд хэдэн тохиолдол бий. Төрийн соёрхолт хөгжийн зохиолч Н.Жанцанноров, Ерөнхийлөгч Ц.Элбэгдорж, МАН-ын ерөнхий нарийн бичгийн дарга асан У.Хүрэлсүх зэрэг олон эрхэм гишүүний суудлаасаа татгалзаж байсан түүхтэй. Тэдний тоог Ерөнхий сайд асар Р.Амаржаргал нэгээр нэмж магадгүй болов.