Монголын хамгийн баян эрхмүүдийн нэгд тооцогдож, нэгэн үе мандаж явсан УИХ-ын гишүүн асан Ш.Сайхансамбуу сүүлийн өдрүүдэд гундуухан явна. Өөрийнх нь мэдэлд байдаг “Нарантуул” захын хүнсний хэсэг шатаж, түрээслэгчдийн олон сая төгрөгийн өр төлбөрийг Ш.Сайхансамбуу төлөх болсон. Энэ гэнэтийн хохирлоо барагдуулаагүй байхад хэдхэн хоногийн өмнө “Нарантуул-2” зах дахин шатлаа. Хэрэв албаныхан цахилгааны гэмтлээс болсон гэж дүгнэх юм бол Ш.Сайхансамбуу дахин багагүй хохирол амсахаар боллоо. Түүнд ийм хүндхэн өдрүүд иржээ.  Дээр нь олон жил зүтгэсэн МАН-даа энэ эрхэм ямар ч албан тушаалд томилогдож чадсангүй. Ядаж л саяын Шинэчлэлийн гэх Их хурал, Бага хурлын гишүүнээр ч сонгогдсонгүй.

   2012 оны УИХ-ын сонгуульд тэрбээр нэр дэвших хүсэлтэй байгаагаа ил тод илэрхийлсэн ч түүнийг МАН нь дэмжээгүй, Д.Балдан-Очирыг түүгээр солисон. Гэсэн ч Ш.Сайхансамбуу шантралгүй Засгийн газарт орох хүсэлтэй байгаагаа хэвлэлээр ярьж байв. Нам нь цөөнх болсон үед тэрбээр МАН-ын Нийслэлийн намын хорооны дэд даргаар ажиллах болсон. Гэлээ ч түүнийг намынх нь шинэ удирдлагууд харж үзэлгүй, орхилоо. Бизнес нь урагш муутай, удаа дараа их хэмжээний хохирол амсаад байхад нь дэмжиж дуугарах нэг ч хүн гарсангүй.

  Уг нь тэрбээр Их хурал, Бага хурлын төлөөлөгчөөр сонгогдох хүсэлтэй байсан ч зарим хүний нөлөөгөөр орж чадаагүй байна. Түүнийг ингэж шалз шиг хаях болсонд хамгийн их нөлөөлсөн хүн нь Д.Оюунхорол гишүүн гэх мэдээлэл ч тараад байгаа. Ш.Сайхансамбуу Их хурлын төлөөлөгч болж чадаагүйдээ бухимдан “Хурлын төлөөлөгчдийг хайрцганд хийсэн ангайхай шиг аваад ирдэг болж” гэж хэлсэн нь МАН-ынханы дургүй, бухимдлыг зэрэг өдөөсөн гэх яриа ч гарсан. Ийнхүү МАН-ын нөлөө бүхий гишүүдийн нэг байсан Ш.Сайхансамбуугаас МАН-ынхан нүүр буруулсаар байна.