Оюутны 70.000 УИХ-ын гишүүдийн толгойг “өвтгөж” байна. Ялангуяа АН-ынханы өмнө том сорилтыг бий болголоо. Өнгөрсөн жил АН-ынхан бүх л оюутанд 70.000 төгрөгийг ардчилсан зарчмын дагуу ялгахгүй, ижил тэгш олгох ёстой гэсэн гоё ганган тайлбаруудыг урсгаж байсан. Тэр ч бүү хэл “оюутнуудад өгөх хэрэггүй” гэсэн Ардын намын зарим гишүүдийг “оюутнуудын болоод нийгмийн дайсан” болгон цоллож байсан.

    Гэтэл энэ жил АН-ынхан оюутны 70.000 төгрөгнөөс татгалзаж эхэлсэн нь том асуудлыг үүсгэлээ. Өнгөрсөн жил “өгөх шаардлагагүй” гэж байсан МАН-ынхан өгөх ёстой гэсэн байр суурин дээр очив. Түүгээр ч барахгүй АН-ыг амлалтаа биелүүлэхийг шаардсаар байна. Ингэж хоёр намын байр суурь 180 градус эргэж маргалдаж байх зуур оютануудын бухимдал гал дээр тос нэмэв.

    Бухимдсан оюутнууд УИХ дахь АН-ын гишүүд рүү амлаж байсан 70.000 төгрөгөө өгөхийг сануулж, “сонгууль нэгээр дуусахгүй”, “эргэж уулзах өдөрүүд ирнэ”, “оюутнууд сонгуулийн шоу биш”, “эр хүн хэлсэндээ эмээлт морь харайсандаа байдаг биз дээ”, “юу гэж амласнаа юу ярьж байгаагаа бодож суугаа биз дээ”, “таньд санал хэрэгтэй бол бидэнд 70.000 хэрэгтэй”, “70.000 дээр татгалзаж байгаа бол тойрогтоо ирээд хэрэггүй шүү”, “70.000 төгрөг бодит зүйлээс үлгэр болон замхарч байна уу”, “70.000 архи биш амьдралыг тэтгэдэг”, “авлигалын мөнгөө багасгаж ард түмний хүүхдэд өгөх 70.000 төгрөг болгооч” гэх мэт уран үгстэй мессежийг өдөр шөнөнгүй илгээх болсон талаар Төрийн ордон дахь эх сурвалж мэдээллээ. Бас МАН-ын гишүүдийн байр суурьт талархаж байгаагаа ч илгээхээ мартаагүй аж.
   Арга ядсан АН-ын гишүүд намын удирдлага, бүлгийн дарга, УИХ-ын даргад оюутнуудын дарамт шахалт үзүүлсэн маягийн мессежэнд дарагдах болсноо учирлаж эхэлжээ. Тэр ч бүү хэл оюутнуудыг хэн ингэж турхираад байгааг олох ёстой гэсэн байр суурьт нэгдсэн байна. Зарим гишүүд МОХ-ныхон байж мэднэ гэж ярилцжээ. Ямар ч байсан УИХ-ын гишүүдийг дарамталсан ийм ажиллагааг зохион байгуулсан этгээдийг олохоор болжээ. 

    Сонгогч оюутнуудынхаа дарамттай мессежэнд дарагдсан гишүүдийнхээ зовлонг хуваалцсан УИХ-ын дарга З.Энхболд оюутнууд гишүүд рүү өдөр шөнөгүй мессеж бичээд мөнгөтэй байна. Ядаж мессежийнхээ мөнгийг хэмнэсэй гэсэн байр суурийг баримталж байгаа аж. Тиймээс УИХ-ын дарга З.Энхболд “70000-аа шалгуургүй авах гэсэн оюутнууд УИХ гишүүд рүү SMS бичиж мөнгөө үрэхээ болиоч, үнэгүй twitter facebook ашиглаач” хэмээн өчигдөрөөс зандарч эхлэв.

    Сонирхолтой нь УИХ-ын даргын энэхүү тайлбарыг уншсан оюутнууд бидний мессеж АН-ын гишүүдийг сандаргаж байна. Тиймээс эрчимтэй явуулж байж 70.000 төгрөгөө олж авья хэмээн ярилцсан сураг гарав. Тэгэхээр оюутнуудын 70.000 төгрөгийн төлөөх мессеж тасрахгүй бололтой.

    Мөн УИХ-ын гишүүн М.Зоригт “70.000 нэхсэн оюутнууд sms их бичиж байна. 70.000 байтугай аваад, цаашдаа сайн сайхан явья гэвэл сайн сур” хэмээн сургамжилсан бол сайд Х.Тэмүүжин “Үнэхээр сурах сонирхол, суралцах арга барил, судалгаа хийх бүтээлч сэтгэлтэй бол бусадтайгай өрсөлдөөд, сайн суралцаад 70-аас илүүг ав л даа” гэж оюутнуудад сануулга өгөв.

    Энэ мэтээр 70.000 дарамтад орсон гишүүд хүндхэн нөхцөлд төсөвөө батлах гэж хуралдсаар байна.