Энэ жилийн төсөв “авлигажсан” төсөв байсан бол ирэх оны төсөв алдагдал ихтэй төсөв болох нь ээ. 2014 оны төсвийг хэлэлцэхдээ нэг ам.долларыг 1384 төгрөгөөр тооцож оруулж байгаа нь эдийн засагчдыг гайхашруулаад байна. Яг өнөөдөр доллар "Найман шарга" зах дээр 1745 төгрөгийн ханштай байна. Сарын өмнөхөн доллар тэнгэрт гарлаа хэмээн бужигнаж байж 1600 руу буулгасан ч эргээд өсчихлөө. Ханшийг 1600 буюу зуухан төгрөгөөр бууруулахын тулд ингэж хөгөө чирж байгаа юм чинь 1384 болгож 384 төгрөгөөр буулгаж чадна гэдэг юу л бол. УИХ-ын гишүүн Ч.Хүрэлбаатар “2014 онд ам долларын ханш 1384 төгрөг байна гэдэгт итгэх эрүүл ухаантай хүн энэ дэлхий дээр энэ Засгийн газрын сайд нараас өөр байгаа юу? Эдийн засгийн байдал тогтворгүй, ойлгомжгүй дээр нь эрх баригчид бодит байдалтай нийцэхгүй худлаа тайлбар хэлээд байгаа учир долларыг илүү үзэх хандлага нэмэгдэж байна. Үүнийгээ засахгүй бол доллар чангарна” гэж байр сууриа илэрхийлсэн.

   Гэтэл Ерөнхий сайд Н.Алтанхуяг “Бараа бүтээгдэхүүний үнэ өсөөгүй” гэж улаан цайм худал ярьсан шиг Сангийн сайд Ч.Улаан долларын ханш ирэх жил буурна гэж ичих ч үгүй ярьж суух. Сүүлдээ энэ Засгийн газрын сайд нарыг хүнс, барааны үнэ мэддэг эсэхээр нь “АХА” тэмцээн явуулъя гэх онигоо шиг яриа ч гарчээ. Ерөнхий сайд Н.Алтанхуяг “Будаа, өндөг зэрэг хэдхэн барааны үнэ өссөн. Хэрвээ будааны үнэ өсч байгаа бол гурилаа идчих хэрэгтэй” гэж хэлсний дараахан Үндэсний Статистикийн хорооноос 10-р сарын байдлаар 40 нэрийн барааны үнэ нэмэгдснийг мэдээллээ. Чухам хэнд нь итгэх болоод байна?

   МАН-ынхан энэ “хийсвэр” ханшийг эсэргүүцсээр байгаа. Харин ам.доллар 1384 төгрөгт хүртэл буурч чадахгүй гэдэг нь тодорхой байхад АН-ын гишүүдээс нэг нь ч дуугарахгүй байна.  Өнөө, маргаашгүй 2014 оны улсын төсөв батлагдах гэж байхад “засах” тухай эрх баригчид ам ч нээхгүй байгаа нь энэ чигээр нь баталчих вий гэсэн айдсыг эдийн засагчидад бий болгожээ. Ирэх жил бүсээ чангална шүү, гадны хөрөнгө оруулалт бага, гадаад өр ихтэй гэж анхааруулаад байхад Ерөнхий сайд Н.Алтанхуяг, Сангийн сайд Ч.Улаан нар юу бодож суугаа бол?