Ерөнхийлөгчийн Тамгын газрын дарга Д.Цагаан өнөөдөр Ерөнхийлөгчийн санаачилгаар зохион байгуулагдаж буй “Том төрөөс, Ухаалаг төр лүү” үндэсний зөвлөлдөх уулзалтын талаар мэдээлэл хийлээ.

Энэ сарын 16-нд болох зөвлөлдөх уулзалтад шийдвэр гаргах төвшний төлөөлөл, Орон нутгийн удирдлагуудын төлөөлөл, Бизнес эрхлэгчдийн төлөөлөл, Эрдэмтэн судлаачдын төлөөлөл, Хэвлэл мэдээллийн байгуулагуудын төлөөллүүд оролцох бөгөөд нийтдээ 800 орчим төлөөлөгчид оролцохоор бүртгүүлээд байгаа аж. Түүнчлэн бизнес эрхлэгчдын хувьд улсад хамгийн их татвар төлсөн байдлаар нь уулзалтанд оролцуулж байгаа гэдгийг хэлж байсан юм.

Энэ үеэр П.Цагаан дарга "Монгол гэдэг их айлын бүхий л асуудлыг энэхүү зөвлөлдөх уулзалтаар  хэлэлцэнэ. Өнгөрсөн хугацаанд бид бүхэн маш их ололтод хүрсэн. Тухайлбал, 24 жилийн өмнө хувийн өмч хориотой байсан бол өнөөдөр хувийн хэвшил Монгол Улсын дотоодын нийт бүтээгдэхүүний 80 хувийг хангаж байгаа. Өнгөрсөн хугацаанд гарсан алдаа оноогоо шүүгээд ирэх онуудад зорилт тавих гэж байгаа юм. Хэтэрхий мөрөөдлийн замаар биш, хамгийн гол ямар арга замаар явах вэ гэдэг замын зургаа зурах гэж байна. Хэдий чинээ замын зургаа зөв гаргаад улстөрийн хүчин нь зөв явна тэр чингээгээр Монгол Улсын эдийн засаг тогтвортой байх болно. Ийм байж чадвал Монгол Улс хөгжих боломжтой. Манайд ганцхан бодлого л дутагдаж байна. Бодлогоо цаашидаа тууштай хэрэгжүүлдэг байх хэрэгтэй" гэсэн юм.

Үндэсний зөвлөлдөх уулзалтын нээлт, хаалтын ажиллагааг орон даяар шууд дамжуулах бөгөөд Монгол Улсын Ерөнхийлөгч үг хэлнэ. Энэ үеэр таван салбар хуралдаан хуралдана.
 
Шийдвэр гаргагчдын салбар хуралдааныг УИХ-ын дарга З.Энхболд, УИХ-ын гишүүн Н.Энхболд нар, Бизнес эрхлэгчдийн салбар хуралдааныг Монгол Улсын Ерөнхий сайд Н.Алтанхуяг, УИХ-ын гишүүн С.Дэмбэрэл нар, Орон нутгийн төлөөллийн салбар хуралдааныг Нийслэлийн Засаг дарга бөгөөд Улаанбаатар хотын захирагч Э.Бат-Үүл, Сүхбаатар аймгийн Засаг дарга Ж.Батсуурь нар, Эрдэмтэн судлаачдын төлөөллийн салбар хуралдааныг Ерөнхийлөгчийн Тамгын газрын дарга П.Цагаан, МУИС-ийн ректор А.Галтбаяр нар, Хэвлэл, мэдээллийн төлөөлөл оролцох салбар хуралдааныг Засгийн газрын Хэрэг эрхлэх газрын дарга, сайд Ч.Сайханбилэг, МСЭ-ийн ерөнхийлөгч Б.Галаарид нар тус тус хөтлөн явуулахаар болжээ. Салбар хуралдаануудаас санал зөвлөмж гаргах бөгөөд эдгээрийг нэгдсэн хуралдаанд танилцуулах юм байна.
 
Уулзалтыг нээж 14.00 цагаас Монгол Улсын Ерөнхийлөгч үг хэлсний дараа салбар хуралдаанууд болж 16.40 цаг хүртэл үргэлжилнэ. Нэгдсэн хуралдаан 17.00 цагт эхэлж салбар хуралдаанаас гарсан зөвлөмжүүдтэй танилцах юм байна.