МАН-ын дарга М.Энхболд санаачлан Монголын улс төрийн намуудын дарга нарыг Улаанбаатар зочид буудалд хүлээн авч Үндэсний зөвшилцлийн асуудлаар нээлттэй уулзалт, ярилцлага хийлээ. Уулзалтад АН, Эх орон нам, ИЗНН-аас бусад намууд хүрэлцэн ирсэн юм.  Уулзалт хэлэлцүүлгийн эхэнд МАН-ын дарга М.Энхболд үг хэлээд уулзалтыг хаалттай горимд шилжүүлсэн.

Уг уулзалтаар Монголын улс төр, эдийн засагт болж буй үйл явдлыг дүгнэн хэлэлцэж цаашид хэрхэн хамтран ажиллах, зөв шийдэлд хүрэх талаар харилцан ярилцсан хэмээн намуудын дарга нар хэлж байна. Энэ үеэр намуудын дарга нар цаашид хамтран ажиллахаар санамж бичигт гарын үсэг зурлаа.

Энэхүү нээлтттэй уулзалтаар намууд Монгол Улсын язгуур эрх ашиг, үндэсний аюулгүй байдал, тусгаар тогтнолоо бататган, баялгийн хуваарилалтыг Монголын ард түмэнд тэгш, шударга хүртээх, тогтвортой хөгжпийн бодлогыг боловсруулан хэрэгжүүлэхийн төлөө хамтран ажиллах, улс орны нийтлэг эрх ашгийг тэргүүн зэрэгт тавьж, үндэсний зөвшилцлийн тогтвортой бүтцийг бий болгоход харилцан ойлголцож хамтран ажиллахаа илэрхийллээ.

М.Энхболд дарга үндсэн хууль болон сонгуулийн хууль, улс орны эрх ашигтай томоохон төсөл хөтөлбөр гэх мэт олон ажил дээр цаашид хамтарч ажиллах шаардлагатай гэж уулзалтыг нээж хэлсэн үгэндээ дурдсан юм.

Санамж бичигт, Монгол Улсын Улс төрийн намуудын дарга нар улс эх орныхоо нийтлэг эрх ашгийг үндэс болгон ард түмнийхээ өмнө тулгамдаж буй асуудлаар байр суурь, үзэл бодлоо харилцан ойлголцож нэгтгэн нийгмийн зөвшилцлийг бий болгон Монгол Улсынхаа цаашдын хөгжлийг түргэтгэхэд хувь нэмрээ оруулан идэвхтэй хамтран ажиллахаа илэрхийлж ажиллана гэжээ.

Санамж бичигт:
МАН-ын дарга М.Энхболд, Монголын ногоон намын дарга О.Бум-ялагч, Монголын уламжлалын нэгдсэн намын дарга Б.Батболд, Бүгд найрамдах намын дарга Б.Жаргалсайхан, Монголын социал демократ намын дарга А.Ганбаатар, МҮАН-ын дарга М.Энхсайхан, Эрх чөлөөг хэрэгжүүлэгч намын дарга Ш.Төмөрсүх, Иргэний хөдөлгөөний намын дарга Д.Сүхжаргалмаа, Монголын ардчилсан хөдөлгөөний намын дарга Т.Оюунаа, МАХН-ын даргыг төлөөлж нарийн бичгийн дарга, Хамуг Монгол хөдөлмөрийн намын дарга С.Молор-Эрдэнэ, Эх орончдын нэгдсэн намын дарга Г.Ганбат, Хөдөлмөрийн үндэсний намын дарга Т.Энхбаяр нар гарын үсэг зуржээ.