Улсын Их Хурлын Тамгын газрын Ерөнхий нарийн бичгийн дарга Б.Болдбаатар БНХАУ-ын Түвдийн Өөртөө засах орны Ардын Төлөөлөгчдийн Их Хурлын Байнгын хорооны Ерөнхий нарийн бичгийн даргын орлогч Дуньжуданзэн тэргүүтэй төлөөлөгчдийг өнөөдөр хүлээн авч уулзав.

  Уулзалтын эхэнд Түвдийн төлөөлөгчид Монгол Улсад зочилж буйдаа баяртай байгаагаа илэрхийлээд тус Өөртөө засах орны орон нутгийн удирдлагын хувьд Монгол Улсын орон нутгийн удирдлагуудтай нягт хамтран ажиллахыг чухалчилж байдгаа хэллээ. Төлөөлөгчдийн тэргүүн Дуньжуданзэн өөрийн төрөлх нутаг Түвдийн талаар товч танилцуулахдаа, дотоодын нийт бүтээгдэхүүний өсөлт өнгөрсөн онтой харьцуулахад 70 тэрбумаар өссөн нь 1959 оноос хойш хурдацтай хөгжиж байгаагийн үр дүн гэж байлаа. Түвд орон Бүгд найрамдах засаглалтай орон болоод 1965 онд анх Түвдийн Ардын Төлөөлөгчдийн Хурлыг зохион байгуулж, БНХАУ-д анхны Байнгын хороог байгуулж байсан түүхтэй бөгөөд 200 гаруй хууль дүрэм баталсан гэдгийг тэрээр хэллээ.

  Улсын Их Хурлын Тамгын газрын Ерөнхий нарийн бичгийн дарга Б.Болдбаатар Монгол Улсад зочлохоор хүрэлцэн ирсэнд нь төлөөлөгчдөд талархал илэрхийлээд БНХАУ-тай өнө эртний харилцаатай манай орон цаашид энэхүү харилцаа, хамтын ажиллагаагаа улам гүнзгийрүүлэхийн төлөө байдаг, хоёр орны парламент хоорондын хамтын ажиллагаа өргөжин тэлж байгааг энэ уулзалт харуулж байна гэдгийг онцлов. Мөн тэрээр Улсын Их Хурлын үйл ажиллагааны талаар төлөөлөгчдөд товч мэдээлэл өгч, нутгийн өөрөө удирдах байгууллагын чадавхийг дээшлүүлэх ажлын талаар санал бодлоо хуваалцаад Улсын Их Хурлын үйл ажиллагааны бүхий л мэдээллийг цахим хэлбэрт шилжүүлснээр иргэд сонгогчдын хяналт сайжирна гэж үзэж буйгаа хэллээ.

  Ноён Дуньжуданзэн Улсын Их Хурлын Тамгын газрын Ерөнхий нарийн бичгийн даргыг БНХАУ-д айлчлах боломж олдвол Төвд орноор зочлохыг урилаа гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.