МАН-ын даргаар томилогдсон М.Энхболд хамгийн түрүүнд улс төрийн намуудын дарга нарыг урьж “Үндэсний зөвшилцөл” хэмээх уулзалт хийхээр болсноо нилээд сүртэй зарлаж байсан. Гэтэл өчигдөр оройны Монголын үндэсний олон нийтийн телевизийн “Цагийн хүрд” мэдээллийн хөтөлбөрөөр энэ тухай ганц ч үг дуугарсангүй. Уг нь “Үндэсний зөвшилцөл” юм бол хамгийн түрүүнд онцлох ёстой л доо. Бас энэхүү уулзалтад эрх баригч намын дарга Н.Алтанхуяг очихоос татгалзав. ИЗНН-ын дарга С.Оюун ч үзэгдсэнгүй. Эвслийг бүрдүүлэгч МАХН дээрээсээ дөрөв, тав дахь хүнээ илгээв. Хийх юмаа олж ядсан жижиг намынхан л ирцгээв. Жинхэнэ бодлого тодорхойлогчид ирсэнгүй.

    Тиймээс МАН-ын даргын урилгыг эдгээр намууд яагаад үл ойшоов гэсэн хардлага бий болов. Эрх баригч хийгээд эвсэгч намын удирдлагууд Монголдоо байсан. Ерөнхий сайд Н.Алтанхуяг орон нутгийн удирдлагуудтай видео уулзалт хийгээд “эртнээс төлөвлөсөн ажил давхцаад амжсангүй” гэсэн хачин тайлбар хийсэн сурагтай. Харин ИЗНН-ын дарга, сайд С.Оюун УИХ-ын чуулганд сонин уншсан шиг сууж, төсвийн талаар байр сууриа илэрхийлэв. Өөрөөр хэлбэл эрх баригч, эвсэгч нарт МАН-ын даргатай уулзсанаас орон нутгийн удирдлага, төсвийн асуудал илүү чухал болж хувирав. Уг нь сэтгэл байсан бол иймэрхүү асуудлыг яаж ч зохицуулж болно л доо. Даанч сөрөг хүчний шинэхэн лидертэй ойлголцох сэтгэл илэрсэнгүй.

    Өмнө нь улс төрийн намуудын иймэрхүү уулзалтууд янз бүрийн нөхцөлд хийгдэж л байсан. Гэвч санаачилга гаргагчдыгаа ингэж үл тоож байсан удаагүй. Ялангуяа МАН-аас иймэрхүү санал гарсан бол бүгд ирцгээдэг байсан. Харин энэ удаа тэгсэнгүй, шинэ асуултын тэмдэг бий болгов. Өөрөөр хэлбэл намынхаа өмнөх бүх дарга нараа үгүйсгэж гарч ирсэн М.Энхболдыг өөр намын дарга нар үл хүндэтгэж байна. Учир нь М.Энхболд МАН-ын үе үеийн дарга нарын хамгийн ахмад болох Г.Очирбатыг Бага хурлынхаа гадна үлдээсэн юм. Бас Н.Багабанди, С.Баяр, С.Батболд, Ө.Энхтүвшингийн багт ажиллаж байсан хүмүүсийг Их, Бага хурлаас зохион байгуулалттайгаар хасч тэдэнд хүйтэн хандах болсноо ойлгуулсан. Ганцхан намын төв аппаратад ажиллаж байсан Б.Даш-Ёндон гуай л байр сууриа хадгалж үлдсэн. Гэхдээ тэрээр Н.Багабанди, С.Баяр хоёрыг дагаж ажиллах талаараа ам алдсан сурагтай. Өөрөөр хэлбэл өмнөх бүх дарга нараасаа туурга тусгаарлаж байгаа М.Энхболдоос нөлөө бүхий намын дарга нар соёлтойгоор татгалзаж байна.

   Уг нь МАН-ын XXVII Их хурлаас “Үндэсний зөвшилцөл” байгуулах тухай уриалга гаргасан л даа. Уриалгыг хэрэгжүүлэх гэж л МАН-ын шинэхэн дарга улс төрийн намуудыг ойлголцлын ширээний ард урьсан. Харамсалтай нь шийдвэр гаргагч, бодлого тодорхойлогчид нь ирсэнгүй. Тэгэхээр МАН-ын XXVII Их хурлынхаа “Үндэсний зөвшилцөл” байгуулах уриалгыг шинэхэн дарга нь тун тааруу байдлаар эхлүүллээ. Учир нь энэ уулзалтад ирсэн хамгийн нөлөө бүхий хүн болох М.Энхсайхан “Зөвшилцөл гэж хэлэхэд эрт байна” гэж дүгнэсэн нь бас нэгийг хэлнэ.
    Улс төрийн ажиглагчдын үзэж байгаагаар бол Засгийн тэргүүн Н.Алтанхуяг түүний урилгаас татгалзах нь зүй ёсны хэрэг гэнэ. Учир нь сүүлийн үеийн мэдээллээр бол М.Энхболд АН-ын зарим бүлэглэлүүдтэй нэгдэн Н.Алтанхуягийн Засгийн газрыг огцруулж хамтарсан Засгийн газарт орох төлөвлөгөөтэй байгаа юм. Ийм төлөвлөгөөтэй хүний урилгад Засгийн тэргүүн мэдээж очихгүй л дээ. Бас засгаас хөөж гаргах гэж байгаа ИЗНН-ын тэргүүн эелдэгхэн зан гаргаад очихгүй л байх. Энэ мэт мэдээллээс болоод эрх баригчид очоогүй байж болох юм. Эсвэл Н.Алтанхуяг өмнө нь М.Энхболдтой ганцаарчилсан уулзалт хийсэн. Ярих юмаа ярьсан. Ойр ойрхон уулзах шаардлагагүй ч гэж мэдэгдэж болох юм. Ямар ч байсан М.Энхболдын анхны уулзалтанд нөлөө бүхий, эрх баригч намын дарга нар очсонгүй нь шинэ дуулианы эхлэлийг тавих шиг боллоо. Энэ асуудлыг тойрсон маргаан, тайлбарууд ар араасаа хөвөрч эхлэх нь гарцаагүй.