Ерөнхийлөгч асан Н.Энхбаярын биеийн байдал сайжирч, Солонгосын хамба ламбатай уулзсан гэх мэдээллийн зэрэгцээ түүнийг ирэх сар шинийн баяраар Монголд ирнэ гэсэн сураг дуулдаад байна. Дуулиан шуугиантайгаар Солонгосыг зорьсон тэрбээр мөн л сүр бараатайгаар Монголд ирэх нь лавтай. Гэхдээ зүгээр нэг ирэхгүй улс төрд дахин хөл тавихаар зэхэх байгааг эх сурвалжууд хэлж байгаа юм. УИХ-ын гишүүн О.Баасанхүү ч үүнийг илэрхийлэх мэт өчигдөр твиттер хуудасдаа “Н.Энхбаяр даргыг сонгуульд өрсөлдөх боломжгүй гээд өмнөөс нь бичдэг болж. Унагах бөх нь айгаагүй байхад унах бөх нь айж гэнэ. Цагийн юм цагтаа” хэмээн бичсэн нь нэгийг илтгэнэ.

   Н.Энхбаяр ийнхүү эргэж ирэхийн тулд улс төрийн шинэ баг бүрдүүлж эхэлсэн байна. Энэ удаа түүнийг тойрон хүрээлэгчид, хамтрагчид нь цоо шинэ хүмүүс байх аж. Учир нь тэрбээр Шинэчлэлийн Засгийн газарт албан тушаалтай болсон намынхаа томчуудтай зам нийлэхээ больсон гэж үзжээ.
    Сүүлийн үед МАН дотор зөрчил хурцдаж байгаатай адил МАН-аас салсан МАХН дотор ч том асуудал байна. Тухайлбал Сангийн сайд Ч.Улаан, шадар сайд Д.Тэрбишдагва нар Н.Энхбаяр гэдэг хүнээс зайгаа барьж эхэлсэн. Н.Энхбаярын эхнэр О.Цолмон нөхрөө шоронд байхад тэдэнтэй уулзахыг хүссэн ч тэд зугтсан гэх мэдээлэл байдаг. Энэ яриа цаг хугацааны шалгуураар батлагдаж эхлээд байгаа. Шадар сайд Д.Тэрбишдагвын хувьд намын даргаа Солонгос явснаас хойш эргээгүй. Мөн Эдийн засгийн хөгжлийн яамны дэд сайд О.Чулуунбаттай ч холбоо сүлбээ нь муудсан байна. О.Чулуунбат намын даргатайгаа уулзах хүсэлтийг удаа дараа тавьсан ч хүлээж аваагүй гэдэг. Энэ мэтээр Засгийн газарт өндөр албан тушаалтай хүмүүс ба Н.Энхбаярын зам салж эхэлжээ. Тиймээс Н.Энхбаяр улс төрд эргэн ирэхийн тулд Солонгосоос цоо шинэ баг бүрдүүлж эхэлсэн байна.

    Энэ ажлыг одоо хамгийн ойрын хүн нь гэгдэх болсон МАХН-ын Ерөнхий нарийн бичгийн дарга Г.Шийлэгдамба хариуцан ажиллаж байгаа аж. МАН-ын 27-р Их хурал дээр үг хэлж, мэндчилгээ дэвшүүлсэн тэрбээр МАН-ын нэлээн хэдэн залуучуудыг шинэ багт оруулахаар тохирсон гэж эх сурвалж мэдээлэв. Харин бас нэгэн эх сурвалж Н.Энхбаярыг сахин Солонгост байгаа эхнэр О.Цолмон нь нөхрийнх нь хүнд үед ойр байсан бизнесмен залуучуудыг холбож, шинэ багийн гишүүдийн тоог нэмж байгаа гэх мэдээлэл байна. Ямартаа ч Н.Энхбаяр хүнд үед зангаа таниулсан хуучуулыг хаяж, цоо шинэ багтайгаар улс төрд эргэн ирэхээр зэхэж эхэлжээ.