Албан ёсны хэлэлцээний дараа Монгол Улсын Ерөнхийлөгч, Европын комиссын Ерөнхийлөгч нар Төрийн ёслол, хүндэтгэлийн их танхимд сэтгүүлчдэд мэдээлэл хийв.

Монгол Улсын Ерөнхийлөгч Ц.Элбэгдорж хэлсэн үгэндээ “Европын комиссын Ерөнхийлөгч эрхэмсэг ноён Жозе Мануэл Баррозо миний урилгыг хүлээн авч Монгол Улсад айлчлал хийж байна. Энэ бол Европын комиссын Ерөнхийлөгчийн хувьд Монгол Улсад хийж байгаа анхны айлчлал юм. Монгол Улсын гадаад бодлогын тэргүүлэх чиглэлийн нэг нь Европын холбоо болон түүний гишүүн орнуудтай харилцах харилцааг бэхжүүлэхэд оршдог. Бид Европын холбоог гуравдагч хөршөө гэж үздэг. Европын холбоо болон түүний гишүүн орнуудын зүгээс Монгол Улсыг ардчилал, зах зээлийн чөлөөт нийгэмд шилжихэд эхнээс нь дэмжлэг үзүүлж ирсэнд Монголын ард түмэн, төр, засаг байнга талархаж байдаг.

Бидний олон жилийн бүтээлч хамтын ажиллагааны үр дүн болж энэ оны дөрөвдүгээр сарын 30-нд Монгол Улс, Европын холбооны хооронд “Түншлэл, хамтын ажиллагааны хэлэлцээр”-ийг байгуулсан. Энэ хэлэлцээр бол Европын холбоо, Монгол Улсын хамтын ажиллагааг өргөжүүлэх газрын зураг болж байгаа юм. Энэ бол зөвхөн Европын холбоо гэдэг ганц байгууллагатай газрын зураг гаргаж байгаа биш, Монгол Улс Европын холбоонд багтаж байгаа 28 улстай түншийн хэмжээнд харилцаатай болж байгаагаараа онцлог чухал ач холбогдолтой.

Сая Европын комиссын Ерөнхийлөгч Жозе Мануэл Баррозо бид хоёр өргөтгөсөн хэлэлцээ хийж олон асуудлаар ярилцлаа. Энэ асуудлуудын хүрээнд худалдаа, эдийн засаг, хөрөнгө оруулалт, боловсрол, шинжлэх ухаан, судалгаа, инновац гээд маш олон салбарыг хөндлөө. Ноён Жозе Мануэл Баррозо маш ажил хэрэгч олон саналыг авч ирсэн байна. Бид эдгээрийг хэрэгжүүлж харилцаагаа өргөтгөхийн тулд хамтарсан хөтөлбөр гаргаж хэрэгжүүлж ажиллах болно.

Эндээс заримыг цохож хэлбэл Хөнгөлөлтийн эдийн засаг гэсэн хөтөлбөр байдаг. Уг Хөнгөлөлтийн ерөнхий схемд Монгол Улс дахин орж ажиллахаар болж байна. Энэ бол Монголд хийсэн бараа, бүтээгдэхүүнийг Европын зах зээлд татваргүй оруулдаг схем юм. Сая Жозе Мануэл Баррозо гуай харилцаагаа зөөлөн дэд бүтцээр дамжуулсан харилцаанд оруулах талаар ярилаа. Боловсрол, инновац, стандарт гээд олон харилцааг хөгжүүлэх бололцоо байна гэдгийг хэлсэнд талархаж байна. Эрхэмсэг ноён Баррозо таны Монгол Улсад хийж байгаа айлчлалд амжилт хүсч, хоёр талын харилцааг улам өргөжүүлэн бэхжүүлэхэд боломж нээнэ гэдэгт итгэж байгаагаа илэрхийлье. Баярлалаа” гэлээ.

Европын комиссын Ерөнхийлөгч Жозе Мануэл Баррозо хийсэн мэдээлэлдээ “Намайг хүндэтгэн хүлээн авч байгаад Монгол Улсын Ерөнхийлөгч Ц.Элбэгдоржид талархал илэрхийлье. Миний хувьд Монгол Улсад айлчилж байгаа анхны Европын комиссын Ерөнхийлөгч болж байгаадаа баяртай байна. Бидний хийсэн уулзалт хоёр талын харилцаанд шинэ үеийг эхлүүлсэн түүхэн чухал өдөр болж байна. Монгол Улс өнгөрсөн 20 гаруй жилийн хугацаанд маш их ололт амжилтад хүрснийг бидний хувьд ажиглаж байдаг. Ардчиллыг олон салбарт бий болгож хөгжүүлэх тал дээр их амжилт гаргасан. Энэ бүхний үр дүнд Монгол Улс олон улсын хамтын нийгэмлэгийн хүрээнд маш их нэр хүндийг хүлээж байгааг хэлэхэд баяртай байна. Бид өнгөрсөн дөрөвдүгээр сард “Түншлэл, хамтын ажиллагааны хэлэлцээр”-ийг байгуулсан нь хоёр талын хамтын ажиллагааг өргөжүүлэх шинэ боломж, нөхцөлүүдийг гаргаж өгсөн. Европын холбооны зүгээс Монгол Улстай тогтоосон харилцаагаа улам өргөжүүлэх боломжуудыг нэмэгдүүлнэ. Ардчиллыг гүнзгийрүүлэн хөгжүүлэхэд бидний үзүүлэх туслалцаа цаашид улам бүр нэмэгдэнэ. Мөн эдийн засгийн харилцаагаа өргөжүүлэн сайжруулна.

Монгол Улстай хамтран ажиллахдаа бид хөгжлийн чиглэлийн хамтын ажиллагааны олон хөтөлбөрийг хэрэгжүүлдэг. Энэ дотор боловсролын салбар, эрдэм шинжилгээ, судалгааны салбарыг чухал салбараар нэрлэлээ. Мөн Европын холбооны ноу хау-г эдгээр салбаруудад нэвтрүүлэх,  Европын холбооны  стандартыг Монголд нутагшуулах нь Монголд хийж буй шинэтгэлийн бодлогыг дэмжсэн алхам болох талаар ярилцлаа. Бид 2014-2020 онд Монгол Улсад хөгжлийн туслалцаа үзүүлэхдээ урьд өмнө байснаасаа нэмэгдүүлэх тухай ярилаа. Эдийн засгийн нээлттэй, оновчтой орчин бүрдүүлэх тал дээр бид хамтран ажиллах боломжтой. Энэ нь Монгол Улсад тогтвортой хөгжил, тэгш боломжийг хангасан өсөлтийг бий болгоход чухал юм. Европын холбоо энэ тал дээр сайн түнш байх болно. Европын холбооны орнуудад Монголын бараа, бүтээгдэхүүнийг хөнгөлөлттэй нөхцөлөөр нийлүүлэх схемийг цаашид үргэлжлүүлэх талаар ярилаа.

2014 оноос эхлэн Европын холбооны хөгжлийн төлөөх зорилтуудын арга хэмжээг Монголд зохион байгуулахаар ярилаа. Бидний харилцаа зөвхөн хоёр талынх байгаад зогсохгүй олон улсын түвшинд хамтран ажиллах талаар нэлээд амжилттай байгаа. Монгол Улс олон улсын хөгжлийн хамтын ажиллагаанд улам бүр жинтэй байр суурьтай болж байгаад бид талархалтай байдаг. Монгол Улс Европын аюулгүй байдал, хамтын ажиллагааны байгууллагад бүрэн эрхт гишүүнээр элссэн. Мөн АОХН-ийн хурлыг эх орондоо зохион байгуулсан. Монгол Улс цаашдаа ардчиллын туршлагаа бусад улс оронд түгээн дэлгэрүүлэх чиглэлээр загвар болно гэдэгт итгэлтэй байна. Монгол Улсаас баримталж байгаа гуравдагч хөршийн бодлого нь бидний хамтын ажиллагааг улам бүр өргөжүүлэхэд тус дөхөм болно.

Би Монгол Улсын түүхийг судалж үзэж байсан. Хүндэлж бишрэх зүйл олон байдаг. Монгол Улсад их сайхан ирээдүй бий гэдэгт итгэлтэй байна. Энэ сайхан ирээдүйг хамтдаа бүтээгч болцгооё. Монгол Улс, Европын холбооны хооронд Дипломат харилцаа тогтоосны 25 жилийн ойг ирэх 2014 онд тэмдэглэнэ. Энэ үеэр Брюссельд айлчлуулахаар эрхэм Ерөнхийлөгч таныг урьж байна. Баярлалаа” гэв.