Долоо хоног бүрийн даваа гаригт УИХ дахь бие даагчдын зөвлөл хэвлэлийн бага хурал хийдэг уламжлалтай. Өнөөдөр тэд Иргэний эрүүл мэндийн даатгалын хуулинд өөрчлөлт оруулах санал гаргаж байгаа талаараа мэдээлэл хийсэн юм.

Энэ талаар УИХ-ын гишүүн С.Ганбаатар “Иргэдийн эрүүл мэндийн даатгалын төлсөн мөнгийг Засгийн газар өнөөдрийг хүртэл төсвийн мөнгө шиг зарцуулаад байна. Үүнийг зогсоох хэрэгтэй. Хариуцлагатай байя, үр дүнтэй байлгая. Иргэд эрүүл мэндийн даатгал төлчихөөд эмнэлэгээс үйлчилгээ авдаг ч сэтгэл ханамжгүй байдаг. Гэтэл нэг ч эмнэлэгт өнөөдрийн байдлаар хариуцлага тооцоогүй байна. Ямар ч хариуцлагын тогтолцоо алга. Мөнгө төлсөн өвчтөнүүдэд эмнэлэгүүд хүндэтгэж харьцахгүй байна. Эмнэлэгүүд тэр мөнгийг дундаас нь дамжуулж байгаа Засгийн газар, сайд дарга нарт таалагдах гэж ажиллаад байна. Тийм учраас энэ хуулийн гол үзэл баримтлал бол даатгуулагчид Эрүүл мэндийн даатгалын газрын даргыг халдаг, сольдог мөнгийг нь авчихаад муу үйлчилгээ үзүүлээд байгаа эмнэлэгүүдэд хариуцлага тооцдог байх хуулиар эрх зүйн орчныг бүрдүүлье” гэлээ.