Бүлгийн хуралдааны эхэнд энэ долоо хоногт чуулганы нэгдсэн хуралдаанаар хэлэлцэх асуудлуудын талаар УИХ-ын дарга З.Энхболд бүлгийн гишүүдэд мэдээлэл өгч, санал солилцлоо.

Ерөнхий сайд Н.Алтанхуяг өнгөрсөн долоо хоногт хийж гүйцэтгэсэн болон энэ долоо хоногт хийх ажлуудаа танилцууллаа.  Энэ сарын 27-ны өдөр Монгол-Улс- ОХУ-ын Засгийн газар хоорондын  хэлэлцээрт оролцох юм байна. Мөн өнгөрсөн долоо хоногт манай улсад айлчлал хийсэн Европийн комиссын ерөнхийлөгч ноён Ж.М. Баррозог хүлээн авч уулзаж,  нийгэм, эдийн засгийн олон чухал асуудлуудыг хэлэлцсэн байна. Түншлэл хамтын ажиллагааны хэлэлцээр хийснээс гадна манай улсын мал аж ахуйн бүтээгдэхүүнийг европийн улс руу хэрхэн экспорлох  асуудлыг ч уулзалтын үеэр мөн онцолжээ.

Үүнээс гадна Замын -Үүд болон тэр дундаа Хамрын хийдийн чиглэлд хатуу хучилттай зам ашиглалтад орж буйг Ерөнхий сайд Н.Алтанхуяг бүлгийн гишүүдэд танилцуулав. Мөн замын хөдөлгөөнд оролцох явцдаа, зөрчил гаргасан автомашины жолоочийн торгуулийг тусгай төхөөрөмжөөр торгодог систем нэвтрүүлэн, торгуулийг бэлэн мөнгөөр хураадаг байдлыг үүгээр халж байгаа юм байна.

Шүүхийн иргэдийн төлөөлөгчийн эрх зүйн байдлын тухай хуулийн 3, 12 дугаар зүйлийн холбогдох заалт Үндсэн хуулийн дөчин есдүгээр зүйлийн 49.2 дахь хэсэг зөрчсөн гэж үзэж № 04 дүгээр дүгнэлтээ гаргасныг УИХ дахь Ардчилсан намын  бүлэг хэлэлцэж хүлээж авах боломжгүй гэж үзэв.

Монгол Улсын Үндсэн хуулийн 52 дугаар зүйлийн 52.2 дахь хэсэгт “ Анхан шатны шүүх хэрэг, маргааныг хамтран шийдвэрлэхдээ Иргэдийн төлөөлөгчийг хуульд заасан журмын дагуу  оролцуулна.” гэж заасан.

Монгол Улсын Үндсэн хуулийн энэ зүйлээр анхан шатны шүүх хэрэг, маргааныг хамтран шийдвэрлэх иргэдийн төлөөлөгчийг оролцуулах асуудлыг  УИХ-д хуулиар тогтоох эрхийг өгсөн гэж ойлгож болно.

Иймээс Үндсэн хуулийн цэц өөрийн бүрэн эрхээ хэрэгжүүлэхдээ Монгол Улсын Үндсэн хуулиар олгогдсон Улсын Их Хурлын бүрэн эрхэд халдахгүй байх, цаашид Үндсэн хуулийн Цэцийн хууль, эрх зүйн орчныг боловсронгуй болгох чиглэлээр ажиллах үүргийг Засгийн газарт өглөө.