Ардчилсан намын бүлгийн дэд дарга С.Одонтуяа намын бүлгийн хурлын үеэр сэтгүүлчдэд мэдээлэл өгч, сонирхсон асуултад нь  хариуллаа.

-Р.Амаржаргал гишүүний тухайд Ардчилсан намын бүлэг өргөдлийг хүлээж авахгүй гэсэн шийдвэр гаргасан байна. Гэтэл УИХ-ын гишүүн Р.Амаржаргал цаашид үндсэн ажлаа хийхгүй байвал яах вэ?

-Ардчилсан намын удирдлагууд Р.Амаржаргал гишүүнтэй уулзаж, ямар шалтгаанаар  УИХ-ын гишүүнээс татгалзаж байгаа шалтгааныг нь тодруулна. Харин Р.Амаржаргал гишүүн цаашид УИХ-ын хуралдаануудад оролцох оролцохгүй нь хувь хүний хүсэл зоригоос шалтгаалах байх. Нэгэнт УИХ-ын гишүүн болж ард түмний төлөөлж байгаа хүний хувьд тийм үйлдэл хийхгүй гэж найдаж байна.

Төрөөс газрын тосны талаар баримтлах бодлогыг Эрдэс баялгийн салбарт баримтлах бодлогод тусгасан уу?

- Төрөөс газрын тосны талаар баримтлах бодлогыг тусад  нь боловсруулж байгаа.Эрдэс баялгийн бодлогод энэ талаар ороргүй. Э.Болорчулуун гишүүнээр ахлуулсан ажлын хэсэг ажиллаж байгаа. УИХ-ын хэлэлцүүлгийн явцад бүлгийн  хуралдаанаар авч хэлэлцэнэ.

-Та Төрөөс эрдэс баялгийн салбарт баримтлах бодлогыг боловсруулах ажлын хэсгийн ахлагчаар ажиллаж байгаа. УИХ-ын тогтоолын төсөл энэ долоо хоногт хэлэлцэгдэнэ. Ямар зарчим барьж ажиллаж байна вэ?

-Төрөөс эрдэс баялгийн салбарт баримтлах бодлогыг боловсруулах тухай УИХ-ын даргын захирамжаар ажлын хэсэг байгуулагдаж ажилласан. Ажлын хэсгийн ахлагчаар би ажиллаж байна. Пүрэв гарагийн чуулганы нэгдсэн хуралдаанаар анхны хэлэлцүүлгийг хийнэ. Анх орж ирсэн хувилбар зарчмын хувьд нэлээд өөрчлөгдсөн. Дотоод, гадаадын хөрөнгө оруулагчдад эргэлзээ төрүүлэхгүйн тулд тодорхой заалтуудыг тусгасан. Төр зөвхөн бүртгэл хяналт зөвшөөрөл өгөхөд төрийн үүргийг хязгаарлая. Бусад бизнесийн үйл ажиллагаанд төрийн эрх үүргийг хязгаарлах заалтыг тусгаж өгсөн. Мөн олон улсын стандарт руу  шилжих тодорхой заалтуудыг тусгаж өгсөн байгаа. Маргаан шийдвэрлэх процесс, эрдэс баялгийн мэргэжлийн холбоодын чадавхийг дээшлүүлэх заалт мөн орсон. Хамгийн гол нь уул уурхайн салбарт үүсээд буй тогтворгүй байдлыг хэрхэн засч залруулах нь тус бодлогын баримт бичигт туссан. Талууд, хөрөнгө оруулагчид, иргэний нийгмийнхний саналыг тусгаж байж хуулийг батлуулдаг байх чухал заалтууд орсон.