УИХ-ын гишүүн асан У.Хүрэлсүх ганц гарын ганган цохилтоороо Гарьдхүүгийн Баярсайхныг сөгдүүлж охид хүүхнүүдээс нэмэх оноо аваад сураг алдарсан. Тэрээр УИХ-ын гишүүнээсээ татгалзаж нэгэн жилийн нүүрийг үзээд Австрали улсад чимээгүйхэн шиг амьдарч байна. Эх сурвалжийн мэдээлж байгаагаар бол тэрээр Австрали улсад хэлний мэдлэгээ дээшүүлж, нөлөө бүхий нэгэн их сургуульд суралцахаар хөөцөлдөөд эхэлжээ.

    Үүний зэрэгцээ саяхан БНСУ явж нэгэн цагт дарга, цэрэг дараа нь дайсан явсан Н.Энхбаяртай уулзсан талаар эх сурвалж мэдээллээ. Тэдний уулзалт нууцлаг бас удаан болсон сурагтай. Харин хэлэлцсэн ярилцсан асуудал нь тодорхойгүй байна. Мэдээж Н.Энхбаярыг баригдахад яагаад өмгөөлөөгүй, дараа нь МАН-ын залуус түүний эсрэг жагссан, МАН хоёр салах болсон шалтгаан, аавынд байхад нь эргэж очоогүй, эрх баригч намын хувьд хамгаалаагүй үндэслэл гээд олон асуудлыг ярилцсан нь гарцаагүй. Дарга, цэрэг явсан тэдний уулзалт халуухан болсон ч байж мэднэ. Эсвэл өнгөрсөн бүхнийг мартаад ирээдүйнхээ төлөө хамтдаа зүтгэхээр ч ярилцсан байж болно.

    Ямар ч гэсэн МАН, МАХН-ынхан уулзалдаж эхэлсэн байна. Тэднийг ингэж ойртох алхам хийхэд эрх баригч ардчилсан хүчний бодлого нөлөөлсөн байж болох юм. Учир нь эрх баригчид МАН-ын дотоод хагарлыг бий болгож нөлөө бүхий эрхэмүүдээс нь хорьж цагдах ажиллагааг үргэлжлүүлж байна. Энэ бүхний эсрэг хагарч биш хамтарч тэмцэх ёстойг ойлгосон байж болох юм.

    Сүүлийн үед гарал угшил нэгтэй МАН, МАХН хоёр нэгдэж нийлье гэх мэт мессежүүдийг илгээх болсон. Энэхүү нэгдэх процесст Н.Энхбаяр, У.Хүрэлсүх хоёрын уулзалт нэмэр болох нь гарцаагүй.

    Хэрэв нөхцөл байдал нэгдэж нийлэх үйл явц руугаа явбал Н.Энхбаяр “МАН-ын даргаа өг” гэж бардамхан хэлэх байх. Мэдээж түүний эрх мэдэлд хүрэх гэсэн энэхүү хүсэлд МАН-ынхан “за” гэж хэлэхгүй л болов уу? Ямар ч байсан Н.Энхбаяр МАН доторх удирдлагуудын зөрчлийг тун чадварлаг ашиглахыг илүүд үзнэ. Харин У.Хүрэлсүх түүний энэхүү хүсэлд ямархуу хариу барихаас олон зүйл шалтгаалахаар боллоо. Ийнхүү МАН, МАХН-ын хилийн чинадад байгаа нөлөө бүхий эрхэмүүдийн ойр ойрхон уулзах уулзалтын эхлэл тавигджээ.