АН-д цөөнгүй удаа парламентын суудал авч өгсөн УИХ-ын гишүүн Р.Амаржаргалын ажлаас чөлөөлөгдөх хүсэлтийг намынхан нь дэмжихгүй байгаа. Намын гишүүд, ерөнхий нарийн бичгийн дарга нь ч “ганцаараа шийдэх асуудал биш” хэмээн байр сууриа илэрхийлсээр байна. Тэгвэл Р.Амаржаргал гишүүн ч өөрийн байр сууриа хамгаалж, гишүүнээс татгалзсан өргөдлийг нь хүлээж автал ажилдаа явахгүй гэдгээ мэдэгджээ.

   Өмнө нь тэрбээр Төрийн ордонд байсан ч хуралд суухаас татгалзан эсэргүүцлээ илэрхийлдэг байсан. Эсвэл гадагш, дотогш лекц уншаад явчихдаг байсан. Сүүлийн нэг жилийн хугацаанд ажлаа хамгийн их тасалсан, ирц багатай гишүүнээр түүнийг нэрлэх нь гарцаагүй болжээ. Ийнхүү эсэргүүцлээ илэрхийлж байгаа түүнийг АН-ын гишүүд нь парламентаас гаргахгүй гэснээс болж сүүлийн үед Р.Амаржаргал гишүүн бүр өрөөндөө ч үзэгдэхээ больжээ. Ойрын эх сурвалжийн хэлснээр тэрбээр Төрийн ордон дахь ажлын өрөөнөөсөө ном, зураг, бичгийн хэрэгсэл гээд эд зүйлсээ гэр рүүгээ зөөсөн байна. Гишүүний өрөөнд ганцхан туслах нь сууж байдаг болсон бөгөөд Р.Амаржаргал гишүүний хувьд зөвхөн түлхүүрээ хүлээлгэж өгөхөд бэлэн ханхай өрөө үлдсэн аж. Ийнхүү Р.Амаржаргал АН-ын бүлэг гишүүнээс татгалзах хүсэлтийг нь хүлээн авахгүй гэсэн ч дахин дахин өргөдөл гаргаж, байр сууриа хамгаалахаар шийдсэн гэв. Харин тэрбээр 2012 оны сонгуульд өөрт нь саналаа өгсөн Сүхбаатар дүүргийн иргэдтэй уулзаж, учир байдлаа тайлбарлан уучлал гуйна гэж мэдэгдсэн тухай яриа саарал ордонд гарчээ.

    Р.Амаржаргал гишүүний ийнхүү зөрүүдлэн зүтгэж байгааг нэг бол үнэхээр улс төрөөс залхсан эсвэл ийм маягаар тохироо хийх гэж буй гэх хардлага байсаар байна. Тэрбээр өмнө нь Ерөнхий сайд, Гадаад хэргийн сайд байсан. Өөрийгөө өдий дайны ажил хийх чадвартай гэдгийг баталсан нэгэн. Тиймээс сайдын суудлаар тохироо хийх гэж намынхнаа шантаажилж байгаа гэх мэдээлэл газар авлаа. Р.Амаржаргал өөрийн биеэр үгүйсгэсэн мэдээлэл хийхгүй л бол үнэний ортой гэж үзэх хүмүүсийн тоо нэмэгдсээр. Гэхдээ нэгэнт байгуулагдаад жил болсон Шинэчлэлийн Засгийн газарт Р.Амаржаргалыг багтаахын тулд хэнийг “жийх” вэ гэдэг маш том асуудал. Бүтцийн шинэчлэл хийж байж л шийдэгдэнэ. Тиймээс зарим нэгний хувьд мянгуужингийн үлгэр мэт сонсогдож байгаа ч үгүйсгэх аргагүй л юм.