МАХН-ын дарга Н.Энхбаярыг огцруулах тухай мэдээлэл гарсантай холбогдуулж тус намын ерөнхий нарийн бичгийн дарга Г.Шийлэгдамба мэдээлэл хийлээ. Энэ үеэр тэрбээр сэтгүүлчдийн тавьсан зарим асуултад хариулт өглөө.

- Танай намын дарга Н.Энхбаярын биеийн байдал ямар байгаа вэ?

- Анхны байдлаа бодвол биеийн байдал нь харьцангуй гайгүй байна. Гэхдээ цаашдаа нарийн шинжилгээнүүдийг өгч эмчилгээгээ үргэлжлүүлэн хийнэ.

- Н.Энхбаяр намын Бага хуралдаа оролцох уу?

- Энэ удаагийн Бага чуулганд Н.Энхбаяр дарга оролцох боломжгүй байгаа. Эмчилгээ нь хийгдэж байгаа учраас эмчилгээг нь тасалдуулах боломжгүй. Харин намын Их хуралд оролцуулах боломжийг бид бүхэн судалж байна. Даргын биеийн байдлаас шалтгаалж асуудал шийдэгдэнэ.

- Намын даргаа өөрчлөнө гэж танай намын зуут, аравтын дарга ярьж байсан? Энэ талаар тайлбар хийхгүй юу?

- МАХН-ын даргыг өөрчлөх асуудал тодорхой түвшинд яригдаагүй. Намын даргын асуудлыг намын Их чуулганаар авч хэлэлцдэг. Их чуулганы хуралдааныг ирэх оны хийхээр төлөвлөөд байгаа. Манай намын гишүүдээс намын даргыг өөрчлөх хүсэлт өргөдөл тавигдаагүй байгаа.

-Эрүүл мэндийн салбарт үүсээд байгаа нөхцөл байдлаас үүдээд Эрүүл мэндийн сайд Н.Удвал сайдад хариуцлага тооцно гэсэн?

-Хэвлэл мэдээллийн хэрэгслээр гүтгэлгийн шинжтэй зүйлүүд явагдаж байгаа. Бид энэ захиалаад хийлгээд байгаа хүмүүсийг нь мэдэж байгаа. Энэ хүмүүст бид эрүү үүсгэн шалгуулахаар цагдаагийн байгууллагад хандсан.

-Бага хурлаар МАН-тай нэгдэх асуудлыг ярьж магадгүй гэсэн мэдээлэл байна. Энэ үнэн үү?

-Энэ асуудлыг ярихгүй. Тийм зүйл огт яригдахгүй.