Дархан-Уул аймгийн АН-ын гишүүд уржигдар тус намын Ерөнхий нарийн бичгийн дарга Ц.Оюундарийг огцрохыг шаардан жагсаал хийсэн. Учир нь Дархан-Уул аймгийн засаг даргын орлогч Г.Баянмөнхийг АН-аас гаргаж, тус аймгийн намын хорооны тамгыг хүчингүй болгох шийдвэрийг Ц.Оюундарь гаргасан юм. Түүнийг МАН-ынханд тал засч Засаг даргын орлогч болсон, Дархан-Уул аймгийн Ардчилсан намын тамгыг хуурамчаар барьсан гэж үзэж байгаа юм. Тэгвэл уг асуудалтай холбогдуулан Ардчилсан намын Ерөнхий нарийн бичгийн дарга Ц.Оюундарь нийслэлийн Цагдаагийн газарт аравдугаар сарын 14-нд захидал илгээж, “Ардчилсан намын дүрмийн дагуу Дархан-Уул аймгийн намын хороог эрх зүйн чадамжгүйд тооцож байгаа тул тус аймгийн намын хорооны УХ31791 дугаартай тамгыг хүчингүй болгож өгнө үү” хэмээн хандсан байна.  Харин  Дархан-Уул аймгийн АН-ын гишүүд "Хүч түрэмгийлсэн үйлдэл, дүрмийн бус тоглолт" гэж үзэн эсэргүүцэж жагсаал хийсэн юм. Тэгвэл Дархан-Уул аймгийн АН-ын зүгээс өнөөдөр хэвлэлийнхэнд мэдээлэл хийлээ. Тэд өнөөдрөөс намын төв байрныхаа үүдэнд Ц.Оюундарийг огцортол суулт хийхээр болсон гэлээ.

Дархан-Уул аймгийн АН хоёр намын хороотой. Алтангадасын гэх тодотголтой намын хороо нь дүрмийн бусаар байгуулагдсан гэж өнөөдөр мэдээлэл хийсэн хүмүүс ярьж байна. Мөн Алтангадасын тодотголтой гэх тус хороо нь Ерөнхийлөгчийн сонгуульд оролцоогүй гэнэ. Тэгсэн мөртлөө намын байр, тамга тэмдэгээ өгдөггүй. Хоорондоо хамтарч ажиллая гэдэг санал тавихад хамтраад ажиллахын оронд одоо байгаа намыг бутаргаж эхнээс нь намыг цэгцэлнэ гэж байгаа аж. Энэ хууль бус үйлдлийг намын Ерөнхий нарийн бичгийн дарга зогсоохын оронд дэмжиж ажиллаж байгаа нь дүрэм зөрчсөн үйлдэл гэв.

Дархан-Уул аймгийн АН-ын дэд дарга Г.Гантулга энэ талаар ярихдаа “АН-ын Ерөнхий нарийн бичгийн дарга Ц.Оюундарь Дархан-Уул аймгийн АН-ыг үйл ажиллагаагаа явуулах эрх зүйн чадамжгүй болсон гэж олон нийтэд мэдээлсэн. Үүнээс болж Дархан-Уул аймгийн АН татан буугдаж байна гэсэн мэдээлэл олон нийтийн дунд цацагдаад байна.  Уг асуудал дээр дөрөөлж АН-ын Алтангадасын гэх тодотголтой хүмүүс тоглолт хийж аймгийн намын хороог шинээр эмхэлэн зохион байгуулна хэмээн асуудал үүсээд байна. Уг асуудлыг намын Хяналтын ерөнхий хорооны хурлаар авч хэлэлцсэн байгаа. Ерөнхий нарийн бичгийн даргын мэдэгдлийг ашиглан Дархан-Уул аймгийн намын хороог хагардуулах гэж шудрага бус үйлдэл хийх гэж байгаад бид бүхэн харамсаж байна. Гэтэл Ерөнхий нарийн бичгийн дарга өөрөө энэ хууль бус үйлдлийг дэмжиж Дархан-Уул аймгийн АН-ыг анхан шатнаас нь зохион байгуулна гэсэн шийдвэрийг гаргаад байна” гэв.

Мөн АН-ын дотор дүрэм биелүүлэх байдал зогссон. Сүүлийн 3-4 жил дотоод сонгуулийн хороо ажиллахаа байсан. Хяналтын Ерөнхий хороо асуудал шийдэхээ больсон. Дөрвөн жилд нэг удаа Их хурал хийх ёстой. Гэтэл таван жил болчихоод байхад Их хурал болоогүй байна. 2013 онд Ерөнхийлөгчийг батламжлах нэрээр Их хурлаа хуралдуулаагүй. Тэгэхээр Дархан-Уул аймгийн АН өөрөө Их хурлыг хуралдуулах шаардлага тавьж байна. Их хурлаараа энэ мэт хууль зөрчсөн асуудлыг авч хэлэлцэх хэрэгтэй гэж тэд мөн хэлж байна.