Энэ жил оюутнууд сар бүр 70.000 төгрөгөө авахаар болов. Гэхдээ ихээхэн тэмцлийн үр дүнд ийм шийдэлд хүрсэн юм. Ийм шийдэлд хүрэхэд оюутнуудын тэмцэл голлох нөлөөлөл үзүүлсэн. Учир нь оюутнууд төсөв хэлэлцэх үеэр УИХ дахь АН-ын бүлгийн гишүүд рүү мессэж бичиж амласнаа өгөхийг шаардсан юм. Энэ шаардлага ч Засгийн газрын тэргүүн Н.Алтанхуягт хүрсэн байна. Тэрээр энэ тухай “Оюутнууд алах гэж байна лээ. Надад нэг өдөр 60 гаруй мессеж ирсэн. Яахаараа ингэдэг билээ гээд гайхаад хартал 70.000 төгрөгөө өг гээд бичсэн байсан. Хайран мөнгө ш тэй” хэмээн учирлав. Ямар ч гэсэн оюутнууд Засгийн тэргүүнийг, УИХ-ын дарга, гишүүдтэй нь дарамталж байгаад энэ жилдээ 70.000 төгрөгтэйгээ үлдлээ. Харин дарамтанд орсон Засгийн тэргүүн ирэх жил өөр аргаар асуудлыг шийдвэрлэх үүргийг холбогдох яаманд үүрэг болгосон гэж эх сурвалж мэдээллээ.