Монгол Улсын Ерөнхийлөгч Цахиагийн Элбэгдорж Бүгд Найрамдах Социалист Вьетнам Улсын /БНСВУ/ Ерөнхийлөгч Чыонг Тан Санг нар энэ сарын 21-нд албан ёсны хэлэлцээ хийлээ. Хэлэлцээний үеэр Их Хурлын гишүүн, Гадаад харилцааны сайд Л.Болд, Монгол Улсаас БНСВУ-д суугаа Онц бөгөөд Бүрэн эрхт Элчин сайд Д.Энхбат, Үндэсний аюулгүй байдлын зөвлөлийн нарийн бичгийн дарга Ц.Энхтүвшин, Батлан хамгаалахын дэд сайд А.Баттөр, Эдийн засгийн хөгжлийн дэд сайд О.Чулуунбат, Зэвсэгт хүчний жанжин штабын дарга, дэслэгч генерал Ц.Бямбажав, Монгол Улсын Ерөнхийлөгчийн үндэсний аюулгүй байдал, гадаад бодлогын зөвлөх Л.Пүрэвсүрэн, Монгол Улсын Ерөнхийлөгчийн байгаль орчин, амьдрах орчны бодлогын зөвлөх Э.Зоригт болон бусад албаны хүмүүс байлцлаа.БНСВУ-ын талаас Шадар сайд, Гадаад хэргийн сайд Фам Бинь Минь, Үндэсний батлан хамгаалахын дэд сайд Чыөнг Гуанг Хань, БНСВУ-аас Монгол Улсад суугаа Онц бөгөөд Бүрэн эрхт Элчин сайд Хаонг Дүан Тхинь болон албаны бусад хүмүүс байлцлаа.
Монгол Улсын Ерөнхийлөгч хэлэлцээний үеэр хэлэхдээ “Монгол Улсын Хууль зүйн яам, Вьетнамын Нийгмийн аюулгүй байдлын яамны хооронд харилцаа тогтож байгаад бид баяртай байдаг. Хоёр орны эдийн засаг, худалдаа, хөрөнгө оруулалтын салбарын харилцааг хөгжүүлэхэд Монгол-Вьетнамын Засгийн газар хоорондын комисс чухал үүрэг гүйцэтгэдэг. Хоёр орны хоорондын Засгийн газар хоорондын хуралдаан Ханой хотноо өнгөрсөн гуравдугаар сард амжилттай болж өнгөрсөн. Энэхүү хуралдаанаар хэлэлцсэн зүйлүүдийг хамтран хэрэгжүүлэхэд бид анхаарч ажиллана. Манай Үйлдвэр, хөдөө аж ахуйн яам Вьетнамын Үйлдвэр, худалдааны яам хооронд харилцаа тогтоож, хамтын ажиллагааны санамж бичиг байгуулах, хүнд хөнгөн үйлдвэрийн салбарт хамтын ажиллагаагаа өргөжүүлэх боломж бий. Хамтарсан хүнсний үйлдвэр байгуулах төслүүдийг дэмжиж ажиллах болно.
Монгол Улс татварын хоёр дахь шатны шинэчлэлийг хийхээр бэлтгэж буйтай холбогдуулан далд эдийн засгийн нөлөөг бууруулах, түүн дотроо бэлэн мөнгөний гүйлгээнд татварын зорилгоор хяналт тавьж буй арга, туршлагыг судлах, төсвийн хяналт, эрсдэлийн удирдлагыг сайжруулах зэрэг асуудлаар хоёр улсын Сангийн яамд болоод харъяа агентлагуудын хамтын ажиллагааг идэвхжүүлэх саналтай байна.
Залуу үеийнхэнд хоёр орны найрсаг харилцаа, хамтын ажиллагааны уламжлал, ард түмний түүх, соёл урлагийг сурталчлан таниулах шаардлагатай байгаа бөгөөд энэ чиглэлээр сэтгүүлч, хэвлэлийн ажилтан солилцох, уран зохиол, түүх, соёлын бүтээгдэхүүнийг харилцан сурталчлах талаар хамтран ажиллах боломжтой байна.
Монголын мал 50 сая гарсан. Бид Вьетнамд хөлдөөсөн мах нийлүүлэх боломж байна. Вьетнамд эмийн үйлдвэрлэл сайн хөгжсөн. Иймээс бид энэ салбарт хамтарч, Монголын эм үйлдвэрлэх төслүүдийг дэмжих боломжтой.
Уул уурхай, газрын тосны салбарт хамтран ажиллах өргөн боломж байна. Энэ удаагийн айлчлалаар надтай хамт бизнесийн олон төлөөлөгч ирсэн. Хоёр талын бизнесийн уулзалт амжилттай болно гэж итгэж байна. Бид цаашид Улаанбаатар-Бээжин-Ханой чиглэлд нислэг хийдэг болбол хоёр орны харилцаанд томоохон түлхэц болно гэж үзэж байна. Боловсролын салбарын хамтын ажиллагааг өргөжүүлэх боломжтой. Танай Засгийн газрын зүгээс Монголын оюутнуудад сургалтын тэтгэлэг олгож, үүний тоог улам нэмэгдүүлж байгаад бид баяртай байдаг. Соёл, спортын салбарт хамтран ажиллаж, төлөөлөгчид харилцан солилцох боломж бий. Аялал жуулчлалын салбарт харилцаагаа өргөжүүлэх боломж байна. Улаанбаатар Ханой хотын хооронд шууд харилцаа тогтоож, хот тохижилтын тал дээр туршлага солилцох боломжтой.
Олон улсын тавцанд бид харилцан бие биенээ дэмжиж ирсэнд баяртай байдаг. Монгол Улсын АПЕК-т элсэх зорилго хэвээр байдаг. Мөн АСЕМ-ын хүрээнд Монгол Улс яриа хэлэлцээний түнш болох сонирхолтой байгаа. Эдгээрт та бүхний дэмжлэг хэрэгтэй байгааг уламжилъя. НҮБ-ын хүрээнд манай хоёр орон харилцан бие биенээ дэмжих нь чухал байна. Бидний энэхүү уулзалт хоёр орны цаашдын харилцаанд түлхэц болно гэдэгт итгэлтэй байна.
Вьетнам Улсын нэрээ дэвшүүлсэн НҮБ-ын Аюулгүйн Зөвлөлийн байнгын бус гишүүний 2020-2021 оны сонгууль, Монгол Улс нэрээ дэвшүүлсэн НҮБ-ын Аюулгүйн Зөвлөлийн байнгын бус гишүүний 2023-2024 оны сонгуулиар харилцан бие биенээ дэмжих, мөн 2016-2018 оны НҮБ-ын Эдийн засаг, нийгмийн зөвлөлд Вьетнам Улс нэрээ дэвшүүлэхэд бид дэмжихээ илэрхийлж байна.
БНСВУ-ын эрхэмсэг Ерөнхийлөгч Чыонг Тан Санг Таныг тааламжтай цагтаа Монгол Улсад айлчлахыг урьж байна. Мөн Вьетнамын төр засгийн бусад төлөөлөгчдийг Монголд урьж байна. Вьетнамын төр засаг, ард түмэнд улс орноо хөгжүүлэх их үйлстээ улам илүү амжилт олохыг хүсэн ерөөе” гэв.
БНСВУ-ын эрхэмсэг Ерөнхийлөгч Чыонг Тан Санг “Эрхэмсэг ноён Ерөнхийлөгч Таны хоёр орны харилцааг хөгжүүлэхийн төлөө ярьж хэлсэн санал санаачлага бүрийг бид дэмжин ажиллах болно. Ингээд Таныг хоёр орны харилцаа, хамтын ажиллагааны баримт бичгүүдэд гарын үсэг зурах ёслолд оролцохыг урьж байна” гэв.
Мөн уг айлчлалын үеэр Монгол Улсын Ерөнхийлөгч Цахиагийн Элбэгдорж Бүгд Найрамдах Социалист Вьетнам Улсын /БНСВУ/ Ерөнхийлөгч Чыонг Тан Санг нар Монгол Вьетнамын харилцаа, хамтын ажиллагааны баримт бичгүүдэд гарын үсэг зурах ёслолд энэ сарын 21-нд оролцов. БНСВУ, Монгол Улс хоорондын найрсаг харилцаа, хамтын ажиллагааг бэхжүүлэн хөгжүүлэх үүднээс Монгол Улсын Ерөнхийлөгч Цахиагийн Элбэгдоржийн Вьетнам Улсад хийж буй төрийн айлчлалын хүрээнд хамтын ажиллагааны дөрвөн бичиг баримтад гарын үсэг зурлаа.
Монгол Улсын Гадаад харилцааны сайд Л.Болд болон БНСВУ-ын Шадар сайд нар, Гадаад хэргийн сайд Фам Бинь Минь БНСВУ-ын Гадаад хэргийн яам, Монгол Улсын Гадаад харилцааны яам хооронд хамтран ажиллах тухай Харилцан Ойлголцлын Санамж Бичигт гарын үсэг зурлаа.
Монгол Улсын Батлан хамгаалахын дэд сайд А.Баттөр болон БНСВУ-ын Үндэсний батлан хамгаалахын дэд сайд Чыөнг Гуанг Хань нар Монгол Улсын Батлан хамгаалах яам, БНСВУ-ын Үндэсний батлан хамгаалах яам хооронд Харилцан Ойлгоцлын Санамж бичигт гарын үсэг зурлаа.
Монгол Улсын Хууль зүйн яамны төрийн нарийн бичгийн дарга Ж.Баярцэцэг, БНСВУ-ын Нийгмийн аюулгүй байдлын дэд сайд, дэслэгч генерал То Лам нар гэмт хэргээс урьдчилан сэргийлэх, тэмцэх чиглэлээр хамтран ажиллах тухай хэлэлцээрт гарын үсэг зурав.
Монгол Улсын Газрын тосны газрын орлогч дарга Ц.Амраа, БНСВУ-ын Газрын тос, байгалийн хийн группын Ерөнхийлөгч До Вань Хау нар хамтын ажиллагааны Санамж бичигт гарын үсэг зурсан байна.
Дараа нь хоёр орны Ерөнхийлөгчид хамтран хэвлэл, мэдээллийн төлөөлөгчид, сэтгүүлчдэд мэдээлэл хийв.
