В.И.Лениний музейн барилгыг АН, МАН хоёр булаацалдаж эхлээд бараг жил  болж байна. Тэгвэл музейн өмчлөлтэй холбоотой шүүх хурал өчигдөр дээд шүүхэд болж тус музейн барилга нь төрийн өмч болохыг тогтоож Монгол Ардын намын эзэмшлээс чөлөөлөх шийдвэрийг гаргасан.

Энэ хурлаар бүх асуудал шийдэгдчихлээ гэж үзэж байтал үгүй бололтой. Тодруулбал, МАН-аас уг шийдвэрийг хүлээн зөвшөөрөхгүй хэмээн дээд шүүхийн дараагийн шат буюу Ерөнхий шүүгчид хандахаар болсон байна.

Учир нь шат шатны шүүх дээр МАН-ын өмгөөлөгч болон хуулчийг үг хэлүүлэлгүйгээр асуудлыг шийдвэрлэсэн гэж тэд үзэж байгаа аж. Эрх баригч хүчин шүүхийн шийдвэрийг өөрсдийнхөө талд гаргахын тулд МАН-ын төлөөлөгчийн үзэл бодол, байр суурийг шүүх хурал дээр хааж байсан. Уг нь шүүх хурал дээр хоёр тал харилцан баримт нотолгоотой мэтгэлзэж, уг үндэслэлээ тайлбарлах ёстой. Гэтэл шүүхээс нэг талд илүү эрхийг олгож асуудлыг шийдвэрлэсэн гэж тус намын Эрхзүй аюулгүй байдлын бодлогын газрын дарга Ш.Раднаасэд хэллээ.

Харин тус намын Ерөнхий нарийн бичгийн дарга Ж.Мөнхбаяр “Бид тус музейн барилгыг үлэг гүрвэлийн музей  болгож болно. Үнэхээр музей байхгүй бол манайхаас барилгыг өгье л гэсэн. Даанч эрх баригч хүчин хууль бусаар манай өмчийг булаах гэсэн. Бид өгвөл өгмөөр л байна” гэхээс өөр дорвитой зүйл хэлж чадсангүй.

МАН-аас тус барилгыг үнэхээр өгмөөр байгаа бол ингэж булаацалдаж шүүхдэх хэрэг юу байна вэ. Удаа дараа шүүх хурал дээр асуудал үүсгэх хэрэг бас байсан уу. Өгмөөр байгаа бол дуугүй л өгчих хэрэгтэй юм. Цаана чинь Т-Батаар байргүй Дарханд явж байна шүү дээ.

Хэрвээ тус музейн барилгыг та бүхэн авч үлдэж чадвал ямар зориулалтаар ашиглах вэ? гэсэн асуултад Ерөнхий нарийн бичгийн дарга “Бид музей хэрэгтэй бол өгнө” гэхээс өөр тодорхой тайлбар хийсэнгүй. Тэд уг барилгыг ямар зориулалтаар ашиглахаа ч хэлж чадахгүй байна. Тэгсэн мөртлөө музей хэрэгтэй бол өгнө гэх юм. Бас барилгаа өгөхгүй хэмээн давж заалдаж шүүхдэнэ гэнэ. Энэ мэтээр Ж.Мөнхбатын хэлж буй үгний утга бүр дээр үеийн диссертацийн хэлээр бол “судлууштай сэдэв" болж орхив. Ямартай ч асуудал хэрхэн шийдвэрлэгдэх нь хэсэг хугацааны дараа тодорхой болох биз ээ.