Монгол Улсын Их Хурал дахь Эмэгтэй гишүүд бидний урилгыг хүлээн авч чуулга уулзалтад хүрэлцэн ирсэн Та бүхэнд та бүхэнд дахин чин сэтгэлийн талархлаа илэрхийлье.

   Эмэгтэйчүүд бидний хувьд үндэс угсаа, шашин шүтлэг, итгэл үнэмшлийн гээд бүхий л төрлийн ялгаанаас үл хамааран гэр бүл, үр хүүхдийн маань сайн сайхан, улс орны амгалан тайван амьдрал хамгаас чухал байдаг билээ. Тийм ч учир хаана улс төр, шийдвэр гаргах түвшин дэх эхчүүд, эмэгтэйчүүдийн оролцоо өндөр байна, тэнд амьдралын чанар сайжирч, ахиц дэвшил гардаг гэдгийг цаг үе харуулж байна.

   Дэлхий ертөнц даяаршиж, хил хязгаарын зааг ялгаа улам бүдгэрч буй өнөө үед энх тайван, хөгжил дэвшлийг улсын хилээр зааглах боломжгүй болжээ. Та биднийг холбогч нийтлэг үнэт зүйлсийн төлөө үр дүнтэй, ойр дотно хамтран ажиллах нь бидний ирээдүйн сайн сайхны баталгаа болно гэж үзэж байна.

  Боловсрол. Энэ бол, хөгжил дэвшлийн гол хөдөлгөгч хүч, амар амгалан амьдралын үндэс, ядуурлыг бууруулах гол арга хэрэгсэл юм. Тэр тусмаа охид, эмэгтэйчүүдийн боловсрол, түүний хүртээмж, чанарыг дээшлүүлэх нь дэлхий нийтийн хэмжээнд гэр бүл, нийгмийн сайн сайхны төлөө хийх хамгийн чухал алхам хэмээн тооцогдож байна. Тиймээс бид боловсролын тухай яриа бол Та биднийг нэгтгэх, аливаа ялгаагаа даван туулж, хамтдаа урагшлах боломжийг олгох чухал асуудал гэдэгт огтхон ч эргэлзэхгүй байна.

  Нэгдсэн Үндэстний Байгууллага, түүний салбар байгууллагуудаас охид эмэгтэйчүүдийн боловсрол, тэгш эрх, оролцооны асуудлыг онцгойлон үзэж, анхаарал хандуулж байгаа нь нэн сайшаалтай. Тиймээс Зүүн хойд Азийн орнуудын эмэгтэй парламентчид бид энэ нэгдмэл сэдвийн дор хуран цуглаж, харилцан туршлагаа хуваалцаж, бүх нийтийн боловсролыг хөгжүүлэх үйлсэд хамтын хувь нэмрээ оруулах талаар санал солилцож байгаа нь ихээхэн утга учиртай, чухал үйл явдал болж байна.

   Монгол Улсын хувьд нийт хүн амын 51,7%, хөдөлмөрийн насны хүн амны 50,4%-ийг эмэгтэйчүүд эзэлж байна. Мөн дээд боловсрол эзэмшигчдийн 64%, магистр, докторын зэрэг эзэмшигчдийн 66%, боловсролын салбарын нийт ажиллагсдын 71,3%, төрийн захиргааны байгууллагад ажиллагсдын 40 гаруй хувийг эмэгтэйчүүд эзэлж, эмэгтэйчүүд нийгмийн амьдралын бүх салбарт идэвхтэй үүрэг гүйцэтгэж байна.

  Зүүн хойд Азийн улс орнууд боловсролын салбараа улам хөгжүүлэх, тэр дундаа эмэгтэйчүүд охидын боловсролын хүртээмж, чанарыг сайжруулах олон санал санаачилгыг гарган хэрэгжүүлж байна. Тэдгээрээс заримаас дурдвал, БНХАУ, ОХУ Үндсэн хууль болон Боловсролын тухай хуулиуддаа бүх түвшний боловсрол эзэмшихэд охид эмэгтэйчүүдийн тэгш эрхийг хангах суурь заалтуудыг тусгаж өгчээ. ОХУ өөрийн Боловсролын үндэсний номлол болон боловсролын шинэчлэлийн баримт бичгүүдэд эмэгтэйчүүдийн боловсролыг тусгайлан авч үзсэн байна. Хятадын Хүүхдийн сан, Залуучуудын сангаас санаачлан хэрэгжүүлдэг “Итгэл”, “Хаврын цоморлиг” зэрэг төсөл хөтөлбөрийн хүрээнд сургууль завсардсан охидыг хичээлдээ эргэн ороход санхүүгийн болон бусад талын туслалцаа үзүүлж байна. БНАСАУ-д нийгмийн амьдралын бүхий л хэсэгт, түүн дунд боловролын салбарт ч эмэгтэйчүүдийн эрхийг хангахад үе үеийн төр засгийн удирдлагууд ихэд анхаарч иржээ. БНСУ-д Хүйсийн тэгш эрхийг хангах асуудлыг эрхэлсэн тусгай яам байгуулагдан, эмэгтэйчүүдийн оролцоо, боловсролын асуудлыг хариуцан ажиллаж байгаа сайхан туршлага байна.

  1995 онд БНХАУ-ын Бээжин хотноо НҮБ-ын манлайлал дор зохиогдсон Дэлхийн эмэгтэйчүүдийн IV Их хурал нь дэлхийн эмэгтэйчүүдийн эрхэмлэх зүйлсийг тунхаглаж, бидэнд учирч буй нийтлэг бэрхшээл сорилтууд, тэдгээрийг даван туулах арга замыг тодорхойлсон, дэлхий даяар эмэгтэйчүүдийн эзлэх байр суурийг ахиулахад нэн чухал үүрэг гүйцэтгэсэн арга хэмжээ болсон.

  Тиймээс энэ завшааныг ашиглан Нэгдсэн Үндэстний Байгууллага болон Катар Улсаас Дэлхийн эмэгтэйчүүдийн V Их хурлыг 2015 онд зохион байгуулахаар санаачилга гаргасныг Монгол УИХ-ын гишүүн эмэгтэйчүүд бид гүнээ талархан дэмжиж байгааг онцлон тэмдэглэхэд таатай байна. Мөн энэ чуулга уулзалтад оролцогч Зүүн хойд Азийн орнуудын эмэгтэй парламентчид та бүхэнд энэ хурлыг санал нэгтэй дэмжиж, цаашилбал бүс нутгийн түвшинд байр суурь, дуу хоолойгоо нэгтгэн оролцохыг энэ хүндэт индрээс уриалж байна.

  Мөн энэ удаагийн чуулга уулзалт бидний хувьд нэг удаагийн арга хэмжээ бус, Зүүн хойд Азийн орнуудын эмэгтэй парламентчдын сүлжээ байгуулагдах эхлэл, бидний урт хугацааны хамтын ажиллагааны үндэс болоосой гэж хүсч байгаагаа онцлон тэмдэглэе. Энэ талаар чуулга уулзалтад оролцогчид Та бүхнээс тодорхой санал, санаачлага гарна гэдэгт итгэж байна.

  Эцэст нь энэ удаагийн арга хэмжээ Та бидэнд албан ажлын төдийгүй хувь хүмүүс хооронд найз нөхдийн нөхөрсөг дотно харилцааг хөгжүүлэх сайхан боломж олгоно гэж итгэж байгаагаа илэрхийлье.