УИХ-ын гишүүн О.Баасанхүү өнөөдөр сэтгүүлчдэд мэдээлэл хийж Ерөнхий сайд руу мессэж явуулахыг уриаллаа.

Тодруулбал тэрээр Засгийн газрын 122 дугаар тогтоол буюу Төрийн тусгай албан хаагчдын нэгдсэн эмнэлгийн барилгыг Хууль зүйн яам прокурорын байгууллагад шилжүүлэх тухай тогтоолыг үндсэн хууль зөрчсөн гэж үзэн цэцээр шалгуулж байсан. Харин Үндсэн хуулийн цэцээс Засгийн газар шийдэх бүрэн эрхтэй гэсэн хариуг  ирүүлснээр энэ асуудал намжаад байсан юм. Тиймээс Үндсэн хуулийн заалт зөрчсөн энэ тогтоолыг хүчингүй болгуулахаар Ерөнхий сайд уруу мессэж бичихийг тэрбээр уриаллаа.

О.Баасанхүү гишүүн хэлэхдээ “Ерөнхий сайд 70 мессэж аваад шоконд орсон гэсэн. Би 7000 мессеж явуулаач гэсэн хөдөлгөөн өрнүүлнэ. МУ-ын ерөнхий сайдаа 122 тоот тогтоолоо хүчингүй болгооч, бидэнд эмнэлэг хэрэгтэй байна. Засгийн газрын ордны хажууд байгаа газрыг эмнэлэг болгож өгөөч гэж хүсч байна" гэв. Мөн Ерөнхий сайдыг мессежээр "булах" энэхүү ажилдаа тэрээр МАХН-ын гишүүдийг татан оруулцуулаад зогсохгүй оюутнуудын хүчийг ч ашиглана гэдгээ энэ үеэр хэлсэн юм. 

Түүнчлэн хэдхэн хоногийн өмнө УИХ-ын гишүүн Л.Эрдэнчимэг түүнийг тамхи үйлдвэрлэгчдийн лоббид автан Тамхины хяналтын тухай хуулийн эсрэг өөрчлөлт оруулах гэж байна хэмээн шүүмжлээд байгаа юм. Энэ талаар сэтгүүлчид түүнээс асуухад ямар нэгэн тайлбар хийгээгүй байна.