УИХ дахь Ардчилсан намын бүлэг өнөөдөр /2013.11.25/ ээлжит хуралдаанаа хийж, үндсэн хоёр асуудлыг хэлэлцлээ.

Бүлгийн хуралдааны эхэнд Өрийн удирдлагын тухай хуулийн төслийг боловсруулж буй талаар Сангийн яамны мэдээллийг сонслоо. Сангийн яамны мэдээлж буйгаар манай улсад  өрийн удирдлагыг зохицуулдаг бие даасан хууль  байхгүй. Энэ асуудлыг шууд болон шууд бусаар 10 гаруй   хуулиар зохицуулж ирсэн юм байна. Тиймээс хуулийн төслийг зайлшгүй боловсруулах ёстой гэж үзжээ.  Өрийн удирдлагын тухай хуулийн төсөлд  Улсын болон Засгийн газрын өрийн хоорондын ялгааг хуульчилж өгсөн. Улсын өрийн хэдэн хувийг Засгийн газрын өр, хэдэн хувийг хувийн хэвшил эзэлж байгаа зэрэг нийгэмд бодитой мэдээлэл өгөх шаардлага байгаа аж. Харин бүлгийн гишүүдийн зүгээс  Монгол Улс өнөөдрийг хүртэл яагаад өрийн удирдлагын талаарх эрхзүйн орчноо бүрдүүлээгүй  байсан талаар санал солилцож, цаашид  Арчилсан намын бодлого эдийн засгийг тэлэх чиглэл рүү хандаж байгаа. Тэлж болно гэдгийг 2013 оны дотоод зах зээлийн өсөлтөөс харагдсан. Тиймээс Өрийн удирдлагын тухай хуулийн төслийг боловсруулахыг дэмжиж,  ирэх сард багтаан УИХ-д өргөн барихыг Засгийн газарт даалгалаа.


Монгол Улсын Ерөнхийлөгчийн санаачилгаар “Том төрөөс ухаалаг төр рүү” үндэсний зөвлөлдөх уулзалт өнгөрсөн долоо хоногт болсон. Уулзалтын үеэр Ерөнхийлөгч Ц.Элбэгдорж хууль эрхзүйн орчныг боловсронгуй болгох чиглэлээр хэд хэдэн зөв, зүйтэй санал гаргасан. Үүнд УИХ, Засгийн газартай холбоотой эрхзүйн орчны асуудал ч байсан. Тиймээс түүний гаргасан хууль эрхзүйн орчны талаарх саналыг Ардчилсан  намын бүлэг дэмжиж, ойрын хугацаанд хэлэлцэх зүйтэй гэж үзэв. Монголын ирээдүй, нийгэм эдийн засгийн хувьд чухал ач холбогдол бүхий  саналууд байсан учраас Ардчилсан намын бүлгийн дэд дарга С.Одонтуяагаар ахлуулсан ажлын хэсэг байгуулж ажиллахаар боллоо. Түүнчлэн энэ асуудлаар  парламент дахь улс төрийн намуудтайгаа зөвшилцөж, бодлогын хүрээнд хамтарч ажиллах нь зүйтэй гэдэгт байр сууриа нэгтгэсэн юм. Мөн энэ асуудалтай холбогдуулан бизнесийн орчинд үүсч буй хүндрэл бэрхшээлүүдийг хэрхэн өөрчилж болох талаар гишүүд санал солилцов. Бизнесийн орчин хүндэрч байгаа, тэднийг  үйл ажиллагаагаа явуулахыг хавчиж байгаа талаар хөндлөнгийн мэдээ мэдээлэл явах болсныг анхаарч, бизнесийн орчныг аль болох тогтвортой явуулах эрхзүйн орчны шинэчлэлийг хийх шаардлагатай гэж үзсэн юм.

Д.Эрдэнэбат: Р.Амаржаргал гишүүний талаар илэрхийлсэн бидний байр суурь хэвээр

Бүлгийн хуралдааны дараа Ардчилсан намын бүлгийн дарга Д.Эрдэнэбат сэтгүүлчдэд мэдээлэл өгч, сонирхсон асуултад хариулсан юм.

-Сонгуулийн нэгдсэн хуулийн төслийн талаар танай намын бүлэг хэлэлцсэн үү. Ямар байр суурьтай байгаа вэ?

-Сонгуулийн нэгдсэн хуулийн   төслийг боловсруулах ажлын хэсэг ажиллаж байна. Ажлын хэсгүүдээс тодорхой саналыг бүлэгт танилцуулаагүй. Он гармагц Сонгуулийн нэгдсэн хуулийн төсөл болоод, Улс төрийн намуудын тухай хуулийн төслийн талаар бусад улс төрийн намуудтай зөвшилцөж, хэлэлцэнэ гэж бодож байна. Хамгийн гол нь парламентад суудалтай намууд нэг зөвшилцөлд хүрснээр энэ хуулийн төсөл батлагдана. Өнөөдрийн үйлчилж байгаа тогтолцоог хэвээр үлдээх үү, эсвэл можаритор 50, пропорциональ 50 хувь байх эсэх дээр тогтоогүй байна. Ажлын хэсэгт ажиллаж байгаа гишүүддээ 50:50 хувь байхаар чиглэлийг өгсөн.

-Төсвийн тогтвортой байдлын хуулиар улсын өрийн хэмжээг ДНБ-ий 60 хувьд хүргэхгүй бол ирэх онд бүтээн байгуулалт зогсоно гэж Ерөнхий сайд хэлсэн. Энэ тал дээр Ардчилсан намын бүлэг ямар байр суурьтай байна вэ?

- Өрийн удирдлагын тухай хуулиар Засгийн газрын өр, Улсын өрийг ялгаж өгсөн, Харин төсвийн тогтвортой байдлын тухай хуулиар бид Улсын өрийн тухай ойлголтыг тодорхойлсон байсан юм. Дэлхийн банк Монгол Улсын өрийн хэмжээ ДНБ-ий 58 хувь гэсэн хязгаарт байхад эдийн засгийн эрсдэл хүлээхгүй гэж дүгнэсэн. Бид энэ тоог  үндэслэсэн.  ДНБ-ий 40 хувь гэсэн нь гаднаас зээл авах асуудлыг хүчтэй хязгаарласан. Олон хөрөнгө оруулалт, бүтээн байгуулалтын ажлыг зогсоох үр дагавар авчирсан ч гэсэн бид гарцыг хайна.  Монгол Улсыг өрөнд оруулах тухай яриагүй. Харин Монгол Улсын эдийн засгийг тэлэх, үндсэн суурь бүтээн байгуулалтаа богино хугацаанд хийх үү эсвэл арван жилийн дараа юу гэдэг үзэл бодлын зөрүү байна гэж ойлгож байна. Төсвийн тогтвортой байдлын тухай хуулийн төсөл болон Өрийн удирдлагын тухай хуулийн төслийг дахин харах шаардлагатай гэсэн байр сууриндаа Ардчилсан намын бүлэг хэвээр байгаа. Тиймээс бид улс төрийн бусад намуудтайгаа зөвшилцөх шаардлага гарна. Өнөөдрийн байдлаар засгийн газрын өрийн хэмжээ ДНБ-ий 31 хувьтай тэнцэж байгаа.  Энэ нь Монгол Улсыг дааж барахгүй өрөнд унагасан гэж үзээгүй.

-Ерөнхийлөгчийн санаачилгаар зохион байгуулсан “Том төрөөс ухаалаг төр рүү” үндэсний зөвлөлдөх уулзалтын үеэр Үндсэн хуулийн өөрчлөлтийн талаар хөндөгдсөн. Тухайлбал, УИХ-ын гишүүн, Засгийн газрын гишүүний ажлыг давхар хашдаггүй байх санал нэлээд хүчтэй байсан.  Та бүхэн үүнтэй санал нэгдэж байна уу?

- УИХ-ын гишүүн, Засгийн газрын гишүүний албыг давхар хашиж байгааг салгана гэдгийг Ардчилсан нам хүлээн зөвшөөрсөн. Харин мөрдөх хугацааг 2016.07.01-ий өдрөөс гэж үзэж байгаа юм.

- Р.Амаржаргал гишүүний талаар Ардчилсан намын бүлэг өнгөрсөн долоо хоногт байр сууриа илэрхийлсэн. Та бүхний байр суурь өөрчлөгдсөн үү. Р.Амаржаргал гишүүнтэй тусгайлан уулзсан уу?

-Р.Амаржаргал гишүүний талаар илэрхийлсэн бидний байр суурь хэвээр. Байнгын хороо болон УИХ-ын чуулганы хуралдаанаар хэзээ хэлэлцэх вэ гэдэг нь УИХ-ын бүрэн эрхийн  асуудал болж үлдсэн.