Их, дээд сургуулийн оюутнууд тэмцэн байж он дуустал 70.000 төгрөгөө авахаар болов. Тиймээс зарим сургуулиуд 70.000 төгрөгийг эхнээс нь олгож эхэллээ. Гэхдээ зарим оюутнуудын хувьд энэ удаагийн үндэсний тэтгэлэг сүүлчийнх нь болно.

    Учир нь оюутнуудын мессеж, сөрөг хүчний шахалтанд орсон эрх баригчид МОХ-ны 70 жилийг бодолцон 70.000 төгрөгийг нь түрдээ олгоё гэдэг дээр ярилцаж тохиролцсон байна. Тэгээд ч оюутнууд 70 жилийнхээ ойг тэмдэглэх нэрээр 70.000 төгрөгийн төлөө улс төр хийх гээд байсан нь болгоомжлол төрүүлжээ. Ингээд МОХ-ны 70 жилийг өнгөрүүлсэний дараа Засгийн газраас БСШУЯ-нд цаашид 70.000 төгрөгийг ямар оюутнуудад олгох талаар шалгуур үзүүлэлт бий болгохыг үүрэг болгожээ. Тэгэхдээ аль болох цөөн оюутанд тэтгэлэг олгох журам боловсруулах чиглэлийг нэмж дайхаа мартаагүй аж.

    Ингээд БСШУЯ ажлын хэсэг байгуулахын зэрэгцээ 70.000 төгрөгийг ирэх оны нэг сараас хэрхэн олгох талаар журам боловсруулах ажилд орж.

    Эх сурвалжийн мэдээлж байгаагаар бол БСШУЯ-ныхан зөвхөн А үнэлгээтэй оюутнуудад л өгөх нь шударга гэсэн эхний гаргалгаагаа гаргаж. Мөн хандив маягаар нэмэлт элсэлтээр орсон, нэг сургуулиас нөгөө сургуульд шилжсэн оюутнуудад тэтгэлэгийг олгохгүй байх төслийг ч санаачилахаар ярилцжээ. Бас нэгээс дээш шалгалтад унасан, шалгалтаа хугацаанд нь өгөлгүй хоцорсон, нэгээс дээш удаа хичээл тасалсан оюутнууд ч ирэх оны нэг сараас эхлэн 70.000 төгрөгийн гадна үлдэж мэдэхээр байна. Энэ мэтээр салбарын яам оюутнуудыг элдэв арга, шалгуур хэмжүүрээр шигшиж байгаад аль болох 70.000 төгрөгийг бултуулах бодлогыг баримталж эхэлжээ.

    Эдийн засгийн нөхцөл байдлаас үүдэн ирэх жилээс 70.000 төгрөгийг тодорхой шалгуураар олгох эрхийг УИХ-аас Засгийн газарт өгсөн. Харин Засгийн газар салбарын яамандаа журам боловсруулах чиглэл өгч судалгааны ажлыг эхлүүлжээ. Удахгүй БСШУ-ны яамны боловсруулсан журамыг Засгийн газрын хуралдаанаар хэлэлцэнэ. Тэр үед 70.000 асуудал дахин дуулиан дэгдээх нь гарцаагүй боллоо.